Vefur í vinnslu
Nýr vefur Akureyrarbæjar er í vinnslu. Vinsamlegast beinið öllum athugasemdum til vefstjórnar, vefstjorn@akureyri.is
Snjómokstur og hálkuvarnir
Snjómokstur og hálkuvarnir eru framkvæmdar samkvæmt ákveðinni forgangsröðun.
Umhverfismiðstöð Akureyrarbæjar að Rangárvöllum hefur umsjón með snjómokstri og hálkuvörnum á götum og gangstéttum í bænum samkvæmt ákveðinni forgangsröðun. Þegar óveður gengur yfir miðast þjónustan við að halda helstu stofnbrautum, tengibrautum, strætisvagnaleiðum og aðgengi að neyðarþjónustu opnu eins og kostur er, en við venjulegar vetraraðstæður gilda vinnureglur sem kynntar eru hér á eftir.
Vinnureglur
Stofnstígar svo sem göngu- og hjólastígar milli bæjarhluta fá forgang í hreinsun ásamt helstu leiðum sem liggja að skólum, leikskólum, strætóbiðstöðvum og helstu stofnunum bæjarins.
Þær götur sem njóta forgangs í snjómokstri eru stofnbrautir, helstu tengibrautir m.a. að neyðarþjónustu eins og sjúkrahúsi, lögreglu, slökkviliði, strætisvagnaleiðum og fjölförnum safngötum. Húsagötur eru ekki mokaðar nema þær séu þungfærar einkabílum eða stefni í að þær verði þungfærar og ef von er á hláku.
Húsagötur og fáfarnari safngötur eru aðeins hreinsaðar ef þær eru þungfærar einkabílum. Almennt er hreinsaður snjór frá innkeyrslum en við snjóhreinsun gatna er þó líklegt að það myndist einhver snjóruðningur eða kögglar við innkeyrslur sem Akureyrarbær nær ekki að hreinsa og þurfa því íbúar að sjá um það sjálfir.Þau svæði gatna sem eru hálkuvarin í bænum eru fyrst og fremst erfiðar brekkur og gatnamót. Til hálkuvarna er notað brotið malarefni sem hefur gott viðnám (kornastærð 2-6 mm). Til að minnka svifryk er fínefnið sigtað frá og einnig er efnið blandað lítillega með salti (5-7%). Saltið minnkar rykmyndun og gerir það að verkum að auðveldara er að vinna með efnið í frosti.
Sandkistur eru á nokkrum stöðum í bænum og þar mega íbúar taka efni til hálkuvarna, en þær eru ekki hugsaðar fyrir verktaka. Sjá Þjónustukort hér fyrir neðan fyrir staðsetningu.
Ábendingar varðandi snjómokstur og hálkuvarnir má senda inn hér.
Leiðbeiningar fyrir þjónustukort
Hægt er að smella á i-merkið til að fá upplýsingar um flokkana eða halda músarbendlinum yfir viðkomandi þjónustuflokk til að sjá forgangsröðunina. Þá er hægt að merkja við hvern flokk fyrir sig og loka öðrum með því að haka fyrir framan flokkana. Smellið á hamborgarann (láréttu strikin þrjú í hægra horninu) til að birta eða fela skýringarmyndina.
Síðast uppfært 27. febrúar 2025