Vefur í vinnslu
Nýr vefur Akureyrarbæjar er í vinnslu. Vinsamlegast beinið öllum athugasemdum til vefstjórnar, vefstjorn@akureyri.is
Um félagsmiðstöðina Sölku
Félagsmiðstöðvarnar Salka og Birta eru lifandi staðir sem bjóða upp á huggulega og fjölbreytta dagskrá sem gestir okkar taka þátt í að móta og framkvæma.
Félagsmiðstöðvarnar Salka og Birta eru lifandi staðir sem bjóða upp á huggulega og fjölbreytta dagskrá sem gestir okkar taka þátt í að móta og framkvæma. Sem dæmi má nefna: vinnustofur, listasmiðjur, leshópa, mömmuhópa, hreyfingu, fræðslu, Pálínukaffi, leirvinnu, spilamennsku, boccia, snóker og pílu. Hjá okkur er alltaf heitt á könnunni, nýjustu blöðin liggja frammi ásamt krossgátum og stöku vísum eða vísnagátum. Flesta daga er heimabakað bakkelsi með kaffinu sem er um kl. 14.30
Einnig eru ýmsir árlegir viðburðir og/eða tilfallandi, svo sem grillveislur, októberfest, þorraskemmtun, páskamarkaður og pizzu- og súpuhádegi.
Lögð er áhersla á sjálfsprottið félagsstarf þar sem hver og einn getur haft áhrif á þróun þess. Hér kemur fólk t.d. saman til að lesa, spila, smíða, sauma, prjóna, ganga og hvað annað sem því dettur í hug að gera.
Við hvetjum ykkur til að kíkja til okkar í kaffi og spjall, hingað eru allir velkomnir.
Hér fyrir neðan er hægt að lesa meira um aðstöðu og stundaskrár í félagsmiðstöðinni Sölku (Víðilundi 22)
Opnunartíma hverrar aðstöðu/rýmis er að finna í stundarskrá Sölku
Leirstofa
Leirstofan er vinnurými fyrir þá sem eru að vinna leir til brennslu. Hér er hægt að sinna eigin verkefnum gegn vægu gjaldi á opnum vinnustofum, kaupa leir á staðnum og fá leirmuni brennda í ofnum hjá okkur. Einnig eru haldin leirnámskeið fyrir byrjendur og eru þau þá auglýst sérstaklega á facebook síðu miðstöðvanna.
Myndlistarstofa
Myndlistarstofa er vinnurými fyrir þá sem eru að vinna að eigin myndlist en hún er einnig nýtt til námskeiðahalds. Við höfum leiðbeinanda á staðnum en einnig koma inn utanaðkomandi kennarar öðru hvoru. Myndlistarnámskeið eru haldin fyrir bæði byrjendur og lengra komna og eru þau þá auglýst sérstaklega á facebook síðu miðstöðvanna.
Handavinnustofa
Handavinnustofan er notuð alla daga vikunnar fyrir handavinnuhópa af öllum gerðum: prjón, hekl, saum, bútasaumur og fatasaumur, svo eitthvað sé nefnt. Hér er hægt að gera við flíkur, fá aðstoð við prjónauppskriftir, koma með prjónahópinn sinn eða bara setjast niður í sófann með það sem er í gangi hverju sinni og njóta félagsskaparins.
Námskeið í saum eða annari handavinnu eru auglýst sérstaklega á facebook síðu miðstöðvanna.
Allrahanda
Rýmið er eins og nafnið gefur til kynna nýtt fyrir ólík verkefni. Tauþrykk, útsaum, alcohol málun, kortagerð, fundarsetu og allt þar á milli. Tvisvar í viku er klúbbastarf í rýminu sem er öllum opið sem eru með útsaum, sjá meira á facebook síðu Klúbbins - saumaklúbbs (sækja þarf um að vera með í facebook-hópnum).
Postulín
Sér rými í suðurkjallara fyrir postulínsmálun. Á staðnum eru brennsluofnar og hægt er að fá keypt nokkra grunnliti til að byrja að mála hjá okkur. Námskeið í postulínsmálun eru auglýst sérstaklega á facebook síðu miðstöðvanna.
Norðursalur
Norðursalurinn hefur notalegt sófahorn og lítið borðstofuborð. Rýmið er bjart og huggulegt og er mikið notað af minni hópum og klúbbum ss prjónahópum, mömmuklúbbum og heilsuhópum.
Matsalur
Salurinn er nýttur fyrir fræðslu, skemmtanir, spil, bingo, kórastarf, heilsueflingu og fleira. Á staðnum er lítið hljóðkerfi og skjávarpi.
- Kaffitími: Alla virka daga kl. 14.30
- Verð fyrir kaffi og meðlæti kr. 800.-
- Verð fyrir kaffi og te: kr. 300.-
- Verð fyrir bakkelsi: kr. 500.-
Opið á opnunartíma miðstöðvanna.
Salurinn er lokaður utanaðkomandi þegar lokaðir hópar nýta hann. Sjá dagskrá heilsueflingar fyrir 60. ára og eldri.
Heilsuefling
Heilsuefling er í salnum fjórum sinnum í viku. Hér má sjá dagskrá heilsueflingar fyrir 60. ára og eldri.
Hellir
Hellirinn er skemmtilegt leikjarými fyrir gesti okkar. Hér er hægt að fara í pílu, pool, tefla, horfa á leik og jafnvel geyma svaladrykk í ísskápnum á milli umferða.
Opið á opnunartíma miðstöðvanna
Síðast uppfært 25. febrúar 2025