Móahverfi

Gert er ráð fyrir að svæðið byggist upp með blöndu af fjölbýlishúsum og sérbýlishúsum. Byggð verður hæst og þéttust neðst á svæðinu nærst Borgarbraut og Síðubraut en eftir því sem byggð er fjær tengibrautunum og hærra í landi verður hún gisnari og lægri. Neðan safngötunnar Langamóa er byggð eingöngu í fjölbýlum en ofan Langamóa eru húsagerðir meira og minna sérbýli.

Hverfið mun byggjast upp með mismunandi íbúðastærðum í öllum húsagerðum, m.a. er gert ráð fyrir lóðum fyrir minni sérbýlishús en einnig sett ákvæði um ákveðið hlutfall stærri íbúða í fjölbýlishúsum. Lögð er áhersla á að íbúðir hafi dvalarsvæði (svalir eða sérafnotahluta) sem snúa vel við sólu eða til suðurs eða suðvesturs.

Á Akureyri eru 14-15% íbúa á grunnskólaaldri og því má gera ráð fyrir 290-360 börnum á grunnskólaaldri í hverfinu. Gert er ráð fyrir að uppbygging hverfisins hefjist úr suðri en það svæði er í um 400 m göngufjarlægð frá Síðuskóla. Í Síðuskóla er svigrúm fyrir fjölgun nemenda og því er gert ráð fyrir að Síðuskóli verði skóli hverfisins til að byrja með. Þá er mögulegt að Giljaskóli verði einnig nýttur sem skóli fyrir börn í hverfinu en göngufjarlægð frá suðurjaðri hverfisins að Giljaskóla er um 700 m. Skoðuð verður þörf fyrir nýjan grunnskóla í tengslum við deiliskipulag næsta áfanga hverfisins sem verður vestan Síðubrautar.

Leikskóli er fyrirhugaður vestan Síðuskóla skv. aðalskipulagi og því er ekki talin þörf á leikskóla innan hverfisins.

Uppbygging er þegar hafin á lóðum sem var úthlutað í 1. áfanga. Lóðir í 2. áfanga eru áætlaðar byggingarhæfar 1. júní 2025 en það gæti þó orðið seinna.

Mæliblöð fyrir lóðirnar má nálgast með því að sækja útboðsgögnin sem er fyrsta skrefið í að senda inn tilboð í byggingarrétt lóða. Ásamt mæliblaðinu má þar finna úthlutunarskilmála, sérákvæði, deiliskipulagsuppdrátt, greinargerð og fleira.

Eingöngu einstaklingar geta boðið í einbýlishúsalóðar og er litið á hjón/sambýlisfólk sem sama einstaklinginn (umsækjandann). Hver einstaklingur getur aðeins fengið byggingarrétt á einni lóð úthlutað hverju sinni.

Bæði einstaklingar og lögaðilar geta boðið í parhúsalóðir. Tveir einstaklingar þurfa sameiginlega að sækja um parhúsalóðir og er litið á hjón/sambýlisfólk sem sama einstaklinginn (umsækjandann).

Eingöngu lögaðilar geta boðið í raðhúsalóðir. Litið er á lögaðila með sömu eigendur og/eða stjórnunartengsl sem einn og sama aðilann.

Ef tilboð í lóðir eru jafnhá að þá ræður hlutkesti nema ef tilboð lögaðila og einstaklinga í parhúsalóð eru jafnhá að þá hefur umsókn einstaklinga forgang og fá þeir lóðina.

Leiðbeiningar um hvernig megi skila inn rafrænu tilboði má nálgast hér.

Ef sótt er um lóð sem er laus til úthlutunar skal skila eftirfarandi gögnum varðandi fjárhagsstöðu sína, fjármögnun lóðar og byggingaframkvæmda með umsókninni en ef lóðin er í útboði skal skila þeim innan 14 virkra daga frá tilkynningu Akureyrarbæjar um að tilboðsgjafi hafi verið hæstbjóðandi eða fengið lóð úthlutaða . Misbrestur á því leiðir til þess að lóðarumsókn verði hafnað. Heimilt er að framlengja framangreindan frest, að beiðni tilboðsgjafa, um allt að tvær vikur ef málefnalegar ástæður eru fyrir hendi að mati Akureyrarbæjar.

Einstaklingar skulu leggja fram eftirfarandi gögn:

• Yfirlýsing banka eða annarrar fjármálastofnunar sem ber með sér að umsækjandi geti staðið undir kostnaði sem áætlaður er vegna byggingarframkvæmda og kaupa á byggingarrétti.
• Staðfestingu viðkomandi innheimtuaðila á því, að tilboðsgjafi sé ekki í vanskilum með opinber gjöld, þ.e. skatta (þ.m.t. VSK), útsvar, fasteignagjöld.

Lögaðilar skulu leggja fram eftirtalin gögn:

• Yfirlýsing banka eða annarrar fjármálastofnunar sem ber með sér að umsækjandi geti staðið undir kostnaði sem áætlaður er vegna byggingarframkvæmda og kaupa á byggingarrétti.
• Ársreikning síðasta árs. Reikningurinn skal sýna jákvæða eiginfjárstöðu, sem nemur að minnsta kosti 15% af tilboðsfjárhæð byggingarréttarins auk gatnagerðargjalds.
• Yfirlýsing viðkomandi lífeyrissjóða um að tilboðsgjafi hafi staðið í skilum með lífeyrissjóðsiðgjöld og gjöld til stéttarfélaga vegna starfsmanna sinna.
• Staðfestingu viðkomandi innheimtuaðila á því, að tilboðsgjafi sé ekki í vanskilum með opinber gjöld, þ.e. skatta (þ.m.t. VSK), útsvar, fasteignagjöld.

Allar upplýsingar um gjöld og greiðslufresti er að finna í úthlutunarskilmálum lóðanna.