Vefur í vinnslu
Nýr vefur Akureyrarbæjar er í vinnslu. Vinsamlegast beinið öllum athugasemdum til vefstjórnar, vefstjorn@akureyri.is
Fasteignagjöld
Eigendur fasteigna greiða fasteignagjöld til sveitarfélagsins. Gjöldin byggja á fasteignamati húsa og lóða ásamt stærð eigna. Álagningarstofninn er fenginn úr fasteignaskrá Húsnæðis- og mannvirkjastofnunar 31. desember ár hvert.
Álagningarseðlar fasteignagjalda hjá Akureyrarbæ eru aðgengilegir í þjónustugátt sveitarfélagsins og á island.is.
Álagningarseðlar eru ekki sendir út á pappír og sparar það bæði fé og fyrirhöfn fyrir utan að vera mun umhverfisvænna. Álagning dreifist líkt og áður á 8 gjalddaga frá 3. febrúar til 3. september og eindagi er 30 dögum síðar.
Álagningarprósenta fasteignaskatts fyrir íbúðarhúsnæði er óbreytt frá fyrra ári og er 0,31% af fasteignamati. Álagningarprósenta af öðru húsnæði er óbreytt 1,63% og 1,32% af fasteignamati skóla, sjúkrahúsa, bókasafna og íþróttahúsa. Sjá nánar í gjaldskrá.
Heildarálagning fasteignagjalda ársins 2025 er 6.444 milljónir króna, þar af er fasteignaskattur 3.817 milljónir, lóðarleiga er 840 milljónir, vatnsgjald 479 milljónir króna, fráveitugjald 768 milljónir og sorphirðugjald 540 milljónir króna. Sorphirðugjald er lagt á 9.069 heimili sem er fjölgun um 313 heimili frá fyrra ári. Á árinu 2024 nam álagning fasteignagjalda samtals 5.857 milljónum króna.
873 lífeyrisþegar fá afslátt
Bæjarstjórn samþykkti breytingu á reglum um afslátt af fasteignaskatti hjá tekjulitlum elli- og örorkulífeyrisþegum og hækkaði tekjumörk. Nú fá 873 elli- og örorkulífeyrisþegar afslátt og nemur heildarfjárhæð afsláttar 83 milljónum króna eða 95 þúsund krónum að meðaltali.
Afsláttur ræðst af tekjum og getur hæstur orðið 149.500 krónur. 150 fasteignaeigendur njóta hámarksafsláttar og 344 fasteignaeigendur njóta fulls afsláttar af fasteignasköttum sínum. Árið áður nutu 962 afsláttar af fasteignaskatti og nam heildarfjárhæðin 90 milljónum króna. Reglurnar er hægt að nálgast hér. Afsláttur af fasteignaskatti er reiknaður út frá tekjum samkvæmt skattframtali 2024 og þarf ekki að sækja sérstaklega um.
Síðast uppfært 27. febrúar 2025