Velferðarráð - 1386

Fjárhagsáætlunarferli fyrir árið 2025 lagt fram til kynningar.

Kolbeinn Aðalsteinsson forstöðumaður sat fundinn undir þessum lið.

Lögð var fram til seinni umræðu beiðni um viðauka við fjárhagsáætlun. Lagt var til að hækka fjárhagsáætlun stoðþjónustu, NPA og notendasamninga og þjónustukaup í sameiginlegum kostnaði í málaflokki fatlaðs fólks um upphæð kr. 88.800.000 vegna ársins 2024.

Kolbeinn Aðalsteinsson forstöðumaður sat fundinn undir þessum lið.

Velferðaráð samþykkir beiðnina fyrir sitt leyti og vísar málinu til bæjarráðs.

Lögð fram drög að samningi Akureyrarbæjar, Eyjafjarðarsveitar, Grýtubakkahrepps, Hörgársveitar og Svalbarðsstrandarhrepps um sameiginlegt þjónustusvæði í Eyjafirði um þjónustu við fatlað fólk.

Velferðarráð samþykkir samninginn fyrir sitt leyti og vísar honum til afgreiðslu bæjarstjórnar.

Lagt var fram minnisblað Guðna Haukssonar húsnæðisfulltrúa dagsett 22. mars 2024 varðandi félagslegt leiguhúsnæði í Grímsey. Lagt til að húsnæði bæjarins í eyjunni sem nú er rekið sem félagslegt húsnæði verði rekið á öðrum forsendum eða selt út úr kerfinu.

Umrætt húsnæði í Grímsey hefur ekki verið notað sem félagslegt leiguhúsnæði. Velferðarráð sér ekkert því til fyrirstöðu að húsnæðið sé selt. Málinu vísað til bæjarráðs.

Guðrún Sigurðardóttir sviðsstjóri og Karólína Gunnarsdóttir þjónustustjóri fóru yfir stöðu innra eftirlits er varðar nauðung og þvingun á velferðarsviði.

Velferðarráð felur sviðsstjóra velferðarsviðs að láta gera óháða úttekt á verkferlum Akureyrarbæjar í tengslum við V. kafla laga um réttindagæslu fyrir fatlað fólk nr. 88/2011 og að í kjölfarið verði gerðar viðeigandi tillögur að úrbótum.



Kolfinna María Níelsdóttir S-lista, Snæbjörn Guðjónsson V-lista, Guðbjörg Anna Björnsdóttir B-lista og Tinna Guðmundsdóttir F-lista óska bókað:

Mikilvægt er að umrædd óháð úttekt og tillögur til úrbóta verði til þess að Akureyrarbær geri ekki mistök við beitingu nauðungar í þjónustu við fatlað fólk.