Ungmennaráð - 44

Nýir fulltrúar voru boðnir velkomnir á sinn fyrsta fund með ungmennaráði og kjör þeirra staðfest.



Þann 1. nóvember var skipað í þrjú sæti í ungmennaráð. Eitt sæti er enn laust en skipað verður í það fyrir næsta fund ráðsins.





Áfram sitja í ráðinu:



Anton Bjarni Bjarkason

Felix Hrafn Stefánsson

Fríða Björg Tómasdóttir

Haukur Arnar Ottesen Pétursson

Heimir Sigurpáll Árnason

Lilja Dögun Lúðvíksdóttir

Telma Ósk Þórhallsdóttir



Nýir fulltrúar eru:



Eiður Reykjalín Hjelm

Elsa Bjarney Viktorsdóttir

París Anna Bergmann Elvarsdóttir



Mættu þau öll á þennan fund.

Fulltrúar kynntu skýrslu ungmennaráðs fyrir síðasta starfsár. Skýrslan er aðgengileg á rafrænum vettvangi ráðsins og mun nýtast til úrbóta í starfsemi ráðsins og í kringum það.

Ungmennaráð tók til umsagnar tillögur um framhald lýðheilsukortsins.

Ungmennaráð tekur vel í tillögu um að framlengja sölutímabil lýðheilsukortsins og hvetur sveitarfélagið til að horfa jákvæðum augum á verkefnið sem framtíðarmöguleika.

Á sama tíma hvetur ungmennaráð sveitarfélagið til þess að setja sína íbúa í forgang og forgangsraða pörum og einstaklingum fram yfir aðra íbúa landsins.

Rætt var stuttlega um vinnu að nýrri lýðheilsustefnu Akureyrarbæjar í tengslum við kynningu Héðins Svarfdal verkefnastjóra lýðheilsumála, fyrir fræðslu- og lýðheilsuráð um málið. Ungmennaráð sendi frá sér bókun um málið.

Ungmennaráð óskar eftir aðkomu að gerð lýðheilsustefnunnar fyrr en seinna í ferlinu en óskað hefur verið eftir frekari gögnum frá Héðni um vinnuna til að geta kynnt sér málið betur og unnið út frá.

Ungmennaráð kynnti sér tilraunaverkefnið Íþróttafélaginn - stuðningur við íþróttaiðkun barna með fjölþættan vanda og rætt var um mikilvægi verkefnisins.

Ungmennaráð tekur vel í málið. Við bindum miklar vonir við að þetta verði börnum sem á þurfa að halda til góðs.

Ungmennaráð tók til umsagnar hugmyndir um uppbyggingu leikskólahúsnæðis í Hagahverfi. Mikið var rætt, skoðanir og áhyggjur viðraðar. Ungmennaráð sendi frá sér bókun um málið.

Ungmennaráð telur að kostur 2 sé besti og í raun eini ákjósanlegi kosturinn fyrir framtíðarleikskóla þó svo að hinar þrjár lóðirnar gætu fyllt inn sem tímabundin lausn á plássleysi sem er í bænum eins og staðan er núna. Verði einhver þeirra þriggja valin til byggingar leikskóla vill ungmennaráð samt sem áður að lóð 2 verði tekin frá til að framtíðarleikskóli geti risið þar seinna meir. Allar lóðirnar þrjár hafa einhverja kosti en gallarnir eru þó fleiri, að mati ungmennaráðs. Ráðið telur gríðarlega mikilvægt að við byggingu á leikskóla á þeim lóðum verði eftir fremsta megni dregið úr áhrifum og áhættuþáttum sem stafa af mikilli umferð, svifryksmengun, vandamálum vegna veðurfars ásamt öðru.

Rætt var um stafrænt læsi barna og ungmenna og þá sérstaklega í tengslum við nýju lýðheilsustefnu Akureyrarbæjar. Ungmennaráð sendi frá sér bókun um málið.

Ungmennaráð fagnar því að bæjarstjórn hafi loksins ákveðið að svara kalli eftir ítrekaðar óskir um að koma á fót aukinni kennslu um stafrænt læsi og almenna upplýsingatæknikennslu. Ráðið harmar þó að þetta sé hugsað sem forvarnamál en ekki sem staðfastara fléttað inn í nám í skólunum. Augljóst er að þörfin er gífurlega mikil hjá öllum kynslóðum og aldurshópum og mun alltaf vera hjá komandi kynslóðum. Stíga þarf fast niður til jarðar í þessum efnum.

Ungmennaráð hvetur bæjarstjórn að leita til okkar og að við fáum að vera hluti að vinnu við lýðheilsustefnuna.

Rætt var um fyrirhugaðar breytingar á reglum varðandi símanotkun í grunnskólum. Mikil hitaumræða varð um málið. Óskað hafði verið eftir því að ungmennaráð tilnefndi fulltrúa í starfshóp sem til stendur að skipa þegar niðurstöður úr könnunum fræðslu- og lýðheilsusviðs um símanotkun liggja fyrir. Ekki náðist lending með það á þessum fundi þar sem þörf var á frekari upplýsingum um starfshópinn. Í kjölfar fundar var óskað eftir þessum upplýsingum frá viðeigandi aðilum. Ákvörðun verður tekin þegar svör berast.