Umhverfis- og mannvirkjaráð - 142

Lagt fram minnisblað dagsett 3. júlí 2023 vegna opnunar tilboða í 1. áfanga Móahverfis, gatnagerð og lagnir.

Umhverfis- og mannvirkjaráð samþykkir að taka lægsta tilboði frá G. Hjálmarssyni hf. að upphæð kr. 798.361.508.

Lagt fram minnisblað dagsett 15. júní 2023 varðandi endurskoðun leiðakerfis Strætisvagna Akureyrar.

Dóra Sif Sigtryggsdóttir forstöðumaður rekstrardeildar og umhverfismiðstöðvar sat fundinn undir þessum lið.

Meirihluti umhverfis- og mannvirkjaráðs samþykkir að marka þá stefnu að reka áfram á Akureyri öfluga og gjaldfrjálsa þjónustu strætisvagna, á grundvelli núverandi leiðakerfis. Ekki verður farið í innleiðingu á nýju leiðakerfi samanber ákvörðun sem tekin var í júní 2021 og var svo frestað fram í ágúst 2022. Fyrir því eru nokkrar veigamiklar ástæður, svo sem: 1. Stofnkostnaður við innviði og fjölgun vagna í nýju kerfi er um 350 mkr. umfram það sem þarf í núverandi leiðakerfi. 2. Árlegur rekstrarkostnaður í nýju leiðakerfi er talinn verða um 50-60 mkr. hærri en þar að auki eru vísbendingar um að kostnaður við mönnun vakta í nýju kerfi sé vanáætlaður. 3. Talning farþega í vögnum undanfarna mánuði bendir til að nýting fari batnandi, sem er ánægjuefni.



Stefnt er að flutningi jöfnunarstöðvar að Glerártorgi á næstu 1-2 árum. Til að endurnýja vagnaflotann verði keyptir tveir rafknúnir strætisvagnar á næstu 2-3 árum og byggðir upp innviðir fyrir hleðslu þeirra. Mögulega þarf að kaupa í millitíðinni annan notaðan díselvagn til að brúa bilið. Ekki er nægilegt framboð á metani í landinu til að fjölga slíkum vögnum. Núverandi leiðakerfi verður lagað að stækkandi byggð svo sem í Móahverfi og Holtahverfi og einnig lagað að breyttum þörfum svo sem með auknum akstri við Sunnuhlíð, vegna nýrrar heislugæslustöðvar. Áfram verða kannaðir möguleikar á að flétta frístundaakstur barna inn í reglubundinn akstur strætisvagna eftir hádegi á virkum dögum. Jafnframt verði fylgst með þróun í almenningssamgöngum s.s. snjall- og deilisamgöngum.



Jana Salóme I. Jósepsdóttir V-lista sat hjá við afgreiðslu málsins.

Lagt fram minnisblað dagsett 3. júlí 2023 vegna tillögu að kaupum á matarvagni í Hlíðarfjall.

Dóra Sif Sigtryggsdóttir forstöðumaður rekstrardeildar og umhverfismiðstöðvar sat fundinn undir þessum lið.

Umhverfis- og mannvirkjaráð afþakkar tilboð um kaup á matarvagni fyrir Hlíðarfjall.

Til umræðu samþykkt um verndun trjáa á Akureyri.

Rut Jónsdóttir forstöðumaður umhverfis- og sorpdeildar og Jón Birgir Gunnlaugsson verkefnastjóri umhverfis- og sorpmála sátu fundinn undir þessum lið.

Umhverfis- og mannvirkjaráð óskar eftir að kannaður verði möguleiki á að fella inn í umhverfis- og loftslagsstefnu ákvæði um verndun trjáa og ásýnd bæjarins og markmið að auka gróður í bæjarlandinu.

Erindi dagsett 20. júní 2023 frá Albertínu Elíasdóttur framkvæmdastjóra SSNE þar sem óskað er eftir umsögn um skýrslu um endurheimt votlendis á Norðurlandi eystra. Umsagnir og athugasemdir óskast sendar á netfangið smari@ssne.is fyrir 15. ágúst nk.

Rut Jónsdóttir forstöðumaður umhverfis- og sorpdeildar sat fundinn undir þessum lið.

Umhverfis- og mannvirkjaráð felur starfsmönnum að vinna drög að umsögn og kortleggja möguleika á endurheimt votlendis í bæjarlandinu.

Lögð fram skýrsla dagsett 1. júní 2023 á rannsóknarverkefni Vegagerðarinnar á upprunagreiningu svifryks á Akureyri.

Rut Jónsdóttir forstöðumaður umhverfis- og sorpdeildar sat fundinn undir þessum lið.

Umhverfis- og mannvirkjaráð þakkar fyrir skýrsluna og þær mikilvægu upplýsingar sem þar koma fram. Staðfest er að bílaumferð er meginorsakavaldur svifryksmengunar á Akureyri og hátt hlutfall malbiks í svifryki er áhyggjuefni. Umhverfis- og mannvirkjaráð samþykkir að hraða endurskoðun á verklagsreglum gegn svifryki og að þær liggi fyrir í september í samvinnu við Vegagerðina og Heilbrigðiseftirlitið. Vísað er til Heilbrigðiseftirlitsins að endurskoða viðbragðsáætlun frá 2020 og gera hana sýnilegri á heimasíðunni.

Minnisblað dagsett 3. júlí 2023 vegna fyrirkomulags eftir innleiðingu nýrra íláta við heimahús.

Rut Jónsdóttir forstöðumaður umhverfis- og sorpdeildar sat fundinn undir þessum lið.

Umhverfis- og mannvirkjaráð samþykkir að fara í útboð á úrgangsílátum vegna innleiðingar á nýju sorpkerfi við heimili og óskað er eftir að kostnaður verði settur inn á fjárfestingaráætlun á árunum 2024-2028.

Lagt fram minnisblað dagsett 3. júlí 2023 vegna viðbótarframkvæmda í inngarði milli A og C álmu.

Sigurður Gunnarsson verkefnastjóri nýframkvæmda sat fundinn undir þessum lið.

Umhverfis- og mannvirkjaráð samþykkir að óska eftir viðauka að upphæð kr. 38.500.000 til bæjarráðs til að ljúka frágangi á inngarði sem liggur milli A og C álmu við Glerárskóla samhliða framkvæmdum við A álmu. Kostnaður sem fellur til á árinu 2023 er um kr. 30.000.000 og kr. 8.500.000 á árinu 2024.



Jana Salóme I. Jósepsdóttir V-lista, Sindri Kristjánsson S-lista og Gunnar Már Gunnarsson B-lista óska bókað:

Undirrituð árétta þá skoðun sína sem áður hefur komið fram í umfjöllun ráðsins um þetta mál að þau eru andsnúin þeirri forgangsröðun meirihlutans í bæjarstjórn að klára ekki framkvæmdir við Glerárskóla í einni atrennu. Þar komi til bæði hagkvæmnissjónarmið og sjónarmið um velferð nemenda. Benda þau á að tvö ár, eða því sem nemur því hléi sem á að gera á framkvæmdum, er jafngildi 1/5 af skólagöngu grunnskólabarns. Það hefur því áhrif á upplifun barna af grunnskólagöngu sinni hvernig framkvæmdahraða og framkvæmdatíma er háttað.

Lagt fram minnisblað dagsett 3. júlí 2023 vegna staðsetningar leikskóla í Hagahverfi.

Sigurður Gunnarsson verkefnastjóri nýframkvæmda sat fundinn undir þessum lið.

Umhverfis- og mannvirkjaráð leggur til að sótt verði um nýja hentuga lóð sem þjónar betur framtíðaruppbyggingu á svæðinu, lóðin sem ætluð er í Hagahverfi er of lítil fyrir þá stærð leikskóla sem lagt er til og staðsetning sunnar muni þjóna betur framtíðaruppbyggingu og þeirri stærð sem menn telja að þurfi til rekstrar.