Stjórn Akureyrarstofu - 287

Sigríður Örvarsdóttir verkefnastjóri safnastefnu kom á fundinn og gerði grein fyrir vinnu við safnastefnu.

Stjórn Akureyrarstofu þakkar Sigríði fyrir góða kynningu.

Lögð fram rekstrarúttekt á Listasafninu.

Stjórn Akureyrarstofu þakkar vel unna rekstrarúttekt, í henni kemur skýrt fram hvað hefur farið úrskeiðis. Stjórnin leggur áherslu á að upplýsingagjöf stjórnenda til stjórnar verði bætt til muna, samráð aukið, að fjárhagsáætlun sé fylgt í hvívetna og farið sé eftir réttum verklagsreglum vegna fjárhagslegra frávika.

Fylgiskjöl

• Rekstraruttekt_a_Listasafni_Akureyrar.pdf

Beiðni til bæjarráðs um viðauka vegna hækkunar á innri leigu.

Stjórn Akureyrarstofu samþykkir að óska eftir því við bæjarráð að veittur verði viðauki við fjárhagsáætlun Listasafnsins að upphæð kr. 4.200.000 til að koma til móts við vanreiknaða innri leigu.

Ástæða þess er sú að eftir að UMSA lauk við húsaleiguáætlun í byrjun september 2018 vegna fjárhagsáætlunar 2019 var keypt umtalsvert af stofnbúnaði fyrir safnið sem hækkaði leiguna sem ekki var tekið með í reikninginn þegar fjárhagsáætlun var samþykkt í nóvember 2018.

Húsaleiga var áætluð 87.384.000 kr. en verður tæpar 88.500.000 kr. á þessu ári. Lausafjárleiga vegna stofnbúnaðar var áætluð 5.547.000 kr. en verður rúmar 8.700.000 kr. á þessu ári. Hækkun er því um 4,2 milljónir króna.

Erindi dagsett 17. október 2019 frá Haraldi Þór Egilssyni safnstjóra Minjasafnsins þar sem óskað er eftir viðræðum við Akureyrarstofu um endurnýjun samningsins sem rennur út um komandi áramót.

Stjórn Akureyrarstofu felur starfsmönnum Akureyrarstofu að taka upp viðræður við safnstjóra Minjasafnsins um endurnýjun á þjónustusamningi.

Fylgiskjöl

• Bref til Akureyrarstofu vegna skaldahusa 17.10.19.pdf

Samkvæmt 6. grein þjónustusamnings á milli Akureyrarbæjar og Minjasafnsins sér Akureyrarbær um að greiða laun starfsmanna safnsins og alla launavinnslu sem því fylgir. Þetta ákvæði þarf að taka til endurskoðunar.

Stjórn Akureyrarstofu felur starfsmönnum Akureyrarstofu að vinna að endurskoðun í samvinnu við safnstjóra og formann Minjasafnsins.

Bæjarráð óskaði eftir því á fundi sínum þann 10. október sl. að stjórn Akureyrarstofu tæki til skoðunar þær hugmyndir sem hafa komið fram um breytta notkun á húsnæði Sigurhæða áður en til sölu kemur. Á fundinum voru lögð fram til kynningar erindi frá Unu Margréti Jónsdóttur, Karli Ágústi Úlfssyni f.h. Rithöfundasambands Íslands auk erindis frá aðila sem leggur fram hugmyndir um notkun.

Í ljósi þess að fram hafa komið hugmyndir og áskoranir um að Sigurhæðir gegni áfram menningarlegu hlutverki samþykkir stjórn Akureyrarstofu að slá á frest hugmyndum um sölu hússins og felur starfsmönnum Akureyrarstofu að útbúa drög að auglýsingu þar sem kallað verði eftir hugmyndum um notkun og rekstur hússins. Í framlögðum hugmyndum komi m.a. fram um hvaða starfsemi ræðir, hvernig hún tengist sögu hússins, hvernig hún verði fjármögnuð og hvernig rekstur muni standa undir húsaleigu og föstum rekstrarkostnaði hússins

Erindi dagsett 9. október 2019 frá stjórn Myndlistarfélagsins þar sem óskað er eftir hækkun á rekstrarstyrk til félagsins og að seinni hluta greiðslu ársins 2019 verði flýtt.

Stjórn Akureyrarstofu getur ekki orðið við beiðni um hækkun á rekstrarstyrk en samþykkir að flýta seinni greiðslu ársins 2019 að því gefnum að öllum gögnum hafi verið skilað.

Fylgiskjöl

• Bre´f til Akureyrarstofu_Myndlistarfelagid_09102019.pdf

Endurskoðaðar leiðbeiningar um samskipti við fjölmiðla lagðar fram til kynningar.

Lögð fram greinargerð frá Hjalta Þórarinssyni verkefnastjóra Flugklasans Air 66N um starf Flugklasans á tímabilinu 1. apríl til 11. október 2019.

Fylgiskjöl

• Flugklasinn - staða okt 2019.pdf

Lagt fram til kynningar rekstraryfirlit janúar til september 2019.

Lögð fram til kynningar gögn frá aðalfundi Hollvinafélags Húna II frá júní 2019.

Fylgiskjöl

• Aðalfundur 2019.pdffundarg.pdf
• Ársreikningur 2018 Hollvinafélag Húna II.pdf
• Siglingar Húna II sumarið 2019 fyrir Akureyrarbæ.pdf