Stjórn Akureyrarstofu - 265

Sigurjón Hákonarson framkvæmdastjóri Ozio ehf. mætti á fundinn og kynnti skýrslu um íbúakort og vef- og þjónustulausnir því tengt bæði fyrir starfsmenn og íbúa.

Halla Margrét Tryggvadóttir sviðsstjóri stjórnsýslusviðs og Dan Jens Brynjarsson sviðsstjóri fjársýslusviðs sátu fundinn undir þessum lið.

Stjórn Akureyrarstofu þakkar Sigurjóni greinargóða kynningu.

Þuríður H. Kristjánsdóttir framkvæmdastjóri MAk mætti á fundinn og fór yfir ársskýrslu og ársreikning MAk sem samþykkt var á aðalfundi félagsins þann 30. október sl.

Einnig var til umræðu ályktun frá aðalfundi LA.

Stjórn Akureyrarstofu þakkar Þuríði fyrir góða kynningu og óskar henni, starfsliði MAk og stjórn til hamingju með góðan árangur á síðasta starfsári.

Fylgiskjöl

• skyrsla-adalfundur 2018.pdf
• MAK ársreikningur 2018.pdf
• Ályktun aðalfundar Leikfélags Akureyrar 2018 - erindi til bæjarstjórnar.pdf

Erindi dagsett 19. september 2018 frá Þuríði H. Kristjánsdóttur framkvæmdastjóra MAk þar sem óskað er eftir fjármagni til kaupa á búnaði fyrir Hof og Samkomuhúsið.

Stjórn Akureyrarstofu samþykkir að óska eftir 10 m.kr. úr áhalda- og búnaðarsjóði umhverfis- og mannvirkjasviðs Akureyrarbæjar árið 2019 til að endurnýja sviðsbúnað og tæki í Hofi og Samkomuhúsinu. Nánari forgangsröðun fari fram í samstarfi MAk og umhverfis- og mannvirkjasviðs.

Skipan fulltrúa í úthlutunarnefnd listasjóðsins Verðandi.

Stjórn Akureyrarstofu samþykkir að tilnefna Huldu Sif Hermannsdóttur sem fulltrúa í úthlutunarnefndina.

Erindi dagsett 21. september 2018 frá Sigríði Huld Jónsdóttur formanni stjórnar FabEY þar sem óskað er eftir áframhaldandi stuðningi Akureyrarbæjar við FabLab smiðju sem staðsett er í húsnæði VMA. Samningur um verkefnið rennur út um nk. áramót og er óskað eftir endurnýjun á samningi fyrir næstu þrjú ár. Jafnframt er óskað eftir að framlag Akureyrarbæjar hækki um 1 m.kr. frá og með árinu 2019.

Stjórn Akureyrarstofu samþykkir að endurnýja samning við FabEY vegna FabLab smiðju í VMA til næstu þriggja ára. Stjórnin samþykkir einnig að stuðningur við starfsemina hækki úr 6,5 m.kr. í 7,5 m.kr. árlega. Jafnframt hvetur stjórn Akureyrarstofu stjórn FabEY til að marka sýn á hvernig starfsemi FabLab smiðjunnar getur orðið fjárhagslega sjálfbærari til framtíðar.



Stjórnin ítrekar ánægju sína með starfsemina og hvetur nágrannasveitarfélög, Nýsköpunarmiðstöð Íslands og aðra hagsmunaðila til að styðja við og nýta sér starf FabLab smiðjunnar.

Fylgiskjöl

• Skýrsla stjórnar FabEy 2016.pdf
• Skýrsla stjórnar FabEy 2017.pdf

Erindi dagsett 24. september 2018 frá Reyni Adólfssyni f.h. Arsborealis félagasamtakanna þar sem komið er á framfæri hugmyndum að Vestnorrænu samstarfi, norðurslóðasamstarfi.

Stjórn Akureyrarstofu felur sviðsstjóra og deildarstjóra Akureyrarstofu að ræða við bréfritara og skoða nánar þá möguleika sem í hugmyndunum felast.