Stjórn Akureyrarstofu - 267

Ragnar Hólm Ragnarsson verkefnastjóri kynningarmála kynnti drög að upplýsingastefnu.

Stjórn Akureyrarstofu óskar eftir því að stefnan verði uppfærð miðað við þær athugasemdir sem komu fram á fundinum og verði lögð fyrir stjórnina á næsta fundi.

Til umræðu með hvaða hætti Akureyrarbær getur eflt kynningarstarfsemi á þjónustu og starfsemi bæjarins til bæjarbúa.

Ragnar Hólm Ragnarsson verkefnastjóri kynningarmála sat fundinn undir þessum lið.

Stjórn Akureyrarstofu samþykkir að fela starfsmönnum að móta markvissar tillögur með hvaða hætti er hægt að auka kynningu á þjónustu og starfsemi Akureyrarbæjar til bæjarbúa. Tillögurnar skulu liggja fyrir um miðjan janúar 2019.

Lagðar fram til kynningar rekstrar- og aðsóknartölur Listasafnsins.

Erindi dagsett 24. október 2018 frá Myndlistarfélaginu á Akureyri, þar sem óskað er eftir að gerður verði samstarfssamningur við Menningarsjóð Akureyrar vegna leigu á húsnæði Mjólkurbúðarinnar, í húsi Listasafnsins.

Erindið var áður á dagskrá á fundi stjórnar Akureyrarstofu þann 1. nóvember sl.



Hilda Jana Gísladóttir bar upp vanhæfi sitt til að fjalla um þennan lið.

Með vísan til 7. mgr. 20. gr. sveitarstjórnarlaga nr. 138/2011 var meint vanhæfi borið upp til atkvæða og var það fellt.

Stjórn Akureyrarstofu getur ekki orðið við þeirri beiðni að gerður verði samningur um greiðslu húsaleigu en samþykkir styrk til starfsemi félagsins að upphæð kr. 200.000 vegna ársins 2018. Stjórnin bendir bréfritara á að hægt verður að sækja um samstarfssamning til Menningarsjóðs Akureyrar í ársbyrjun 2019.

Lagður fram til samþykktar endurnýjaður samningur við Markaðsstofu Norðurlands.

Finnur Sigurðsson V-lista lagði fram eftirfarandi tillögu:

Legg til að upphæð samningsins verði lækkuð um 1 milljón til að nota í kynningarmál sem beint er sérstaklega að þjónustu á vegum Akureyrarbæjar.



Tillagan er felld með atkvæðum Hildu Jönu Gísladóttur S-lista, Önnu Fanneyjar Stefánsdóttur L-lista, Sigfúsar Karlssonar B-lista og Evu Hrundar Einarsdóttur D lista.



Stjórn Akureyrarstofu samþykkir samninginn með atkvæðum Hildu Jönu Gísladóttur S-lista, Önnu Fanneyjar Stefánsdóttur L-lista, Sigfúsar Karlssonar B-lista og Evu Hrundar Einarsdóttur D lista og vísar honum til endanlegrar samþykktar hjá bæjarráði.

Finnur Sigurðsson V-lista greiðir atkvæði á móti.

Lögð fram til kynningar samantekt á yfirvinnu í hlutfalli við dagvinnu á kostnaðarstöðum sem heyra undir stjórn Akureyrarstofu.

Stjórn Akureyrarstofu leggur áherslu á að yfirvinna sé í samræmi við áætlanir.

Erindi dagsett 4. desember 2018 frá Reimari Helgasyni f.h. Íþróttafélagsins Þórs þar sem óskað er eftir styrk að upphæð kr. 400.000 til árlegrar Þrettándagleði félagsins í byrjun næsta árs. Aðgangur að gleðinni er ókeypis en hún hefur verið haldin með stuðningi Akureyrarbæjar og fyrirtækja í bænum.

Stjórn Akureyrarstofu samþykkir styrk að upphæð kr. 250.000 v/Þrettándagleði félagsins.