Skipulagsráð - 437

Lögð fram að nýju að lokinni kynningu skv. 2. mgr. 30. gr. skipulagslaga nr. 123/2010 tillaga að breytingu á aðalskipulagi sem nær til svæðis sem afmarkast af götunum Borgarbraut, Glerárgötu, Þórunnarstræti, Byggðavegi og Klettaborg. Í breytingunni felst að landnotkun svæðisins breytist í miðsvæði þar sem auk uppbyggingar verslunar- og þjónustu verði heimilt að byggja allt að 250 íbúðir. Þá er einnig gert ráð fyrir jöfnunarstöð strætó á svæði milli Borgarbrautar og Glerár á um 0,2 ha svæði og lega stofnstígar breytist. Engar athugasemdir eða umsagnir bárust á kynningartíma vinnslutillögu.

Jónas Valdimarsson verkefnastjóri hönnunar, Dóra Sif Sigtryggsdóttir forstöðumaður rekstrardeildar og Ævar Guðmundsson verkefnastjóri nýframkvæmda sátu fundinn undir þessum lið.

Skipulagsráð leggur til við bæjarstjórn að hún samþykki fyrirliggjandi tillögu að aðalskipulagsbreytingu í samræmi við 3. mgr. 30. gr. og að hún verði auglýst skv. 1. mgr. 31. gr. skipulagslaga nr. 123/2010.

Fylgiskjöl

• ASK-AK-18-30-Breyting27_Glerartorg_2024-09-23.pdf

Lagt fram að nýju erindi dagsett 5. desember 2024 þar sem að Lilja Filippusdóttir fh. umhverfis- og mannvirkjasviðs Akureyrarbæjar óskar eftir breytingu á deiliskipulagi Glerár, frá stíflu til sjávar. Breytingin felur í sér að skilgreind er ný jöfnunarstoppistöð norðan Glerártorgs ásamt ýmsum breytingum á stígum, stofnstígum, göngum, brúm o.fl.

Jónas Valdimarsson verkefnastjóri hönnunar, Dóra Sif Sigtryggsdóttir forstöðumaður rekstrardeildar og Ævar Guðmundsson verkefnastjóri nýframkvæmda sátu fundinn undir þessum lið.

Skipulagsráð telur ekki tímabært að undirgöng undir Hörgárbraut séu tekin út af skipulagsuppdrættinum og leggur til við bæjarstjórn að fyrirliggjandi tillaga, með smávægilegum breytingum, verði samþykkt og hún auglýst skv. 1. mgr. 41. gr. skipulagslaga nr. 123/2010.

Auglýsingu tillögu að breytingu á Aðalskipulagi Akureyrar 2018-2030 sem varðar svæði norðaustan Krossanesbrautar lauk þann 19. desember 2024.Í breytingunni felst að á lóðum við Þursaholt verði heimilt að byggja hjúkrunarheimili og aðra þjónustu við eldri borgara, auk íbúða. Að heimilt verði að þróa svæðið í samhengi við hugmyndafræði um lífsgæðakjarna. Hvorki bárust umsagnir né athugasemdir á auglýsingatímanum.

Skipulagsráð leggur til við bæjarstjórn að hún samþykki framlagða tillögu að breytingu á Aðalskipulagi Akureyrar 2018-2030 skv. 1. mgr. 32. gr. skipulagslaga nr. 123/2010.

Fylgiskjöl

• Ask-Ak-br-hjukrunarheimili_Tillaga-2024-09-08.pdf

Lögð fram að lokinni auglýsingu tillaga að breytingu á deiliskipulagi fyrir Þursaholt 2-12. Engar athugasemdir bárust á kynningartímanum en þrjár umsagnir bárust frá umhverfis- og mannvirkjasviði Akureyrarbæjar, Norðurorku og Minjastofnun Íslands.

Skipulagsráð leggur til við bæjarstjórn að hún samþykki framlagða tillögu að breytingu á deiliskipulagi Holtahverfis norður fyrir lóðina Þursaholt 2-12 skv. 3. mgr. 41. gr. skipulagslaga nr. 123/2010, með minniháttar breytingum til að koma til móts við umsögn umhverfis- og mannvirkjasviðs um útfærslu bílastæða.

Fylgiskjöl

• Holtahverfi-DSK_006-breyting_241025_uppfært eftir fund skipulagsráðs.
• Svar_NO_v_deilisk_Thursholt_2-12.pdf
• Umsögn Þursaholt lífsgæðakjarni - 20241122.pdf
• umsögn mí 19.11 (1).pdf

Lögð fram tillaga að breytingu á deiliskipulagi Hagahverfis til samræmis við bókun skipulagsráðs frá 10. júlí 2024. Í breytingunni felst að bílastæðum við Jóninnuhaga norðanverðan fjölgar um 4.

Meirihluti skipulagsráðs samþykkir að gerð verði breyting á deiliskipulagi til samræmis við erindið. Er breytingin óveruleg skv. 2. mgr. 43. gr. skipulagslaga nr. 123/2010 og skal hún grenndarkynnt skv. 44. gr. laganna. Grenndarkynnt skal fyrir lóðarhöfum Jóninnuhaga 1, Kjarnagötu 65 og Halldóruhaga 2a.



Helgi Sveinbjörn Jóhannsson M-lista situr hjá við afgreiðslu.

Fylgiskjöl

• Jóninnuhagi1-Kjarnagata61-Halldóruhagi2_Dsk-br_2024-01-07.pdf

Lögð fram uppfærð drög að deiliskipulagi fyrir tjaldsvæðisreit þar sem gerðar hafa verið ýmsar breytingar í kjölfar samráðs við velferðarsvið, Norðurorku, umhverfis- og mannvirkjasvið og lóðarhafa Byggðavegar 98.

Meirihluti skipulagsráðs samþykkir að fela skipulagsfulltrúa að kynna fyrirliggjandi drög að endurskoðuðu deiliskipulagi tjaldsvæðisreits skv. 4. mgr. 40. gr. skipulagslaga nr. 123/2010.



Jón Hjaltason óháður situr hjá við afgreiðslu málsins.

Þórhallur Jónsson D-lista situr hjá við afgreiðslu málsins og óskar bókað eftirfarandi:

Ég tel að nýtingin á Tjaldsvæðisreit sé ekki nægileg og fjölga ætti íbúðum um 60 og hækka húsin í suðausturhorni reitsins. Skuggavarp af þeim byggingum hefði ekki áhrif á neina íbúa í nágrenni. Eins tel ég að stígur sem liggur norður - suður þurfi að hlykkjast vegna vinda.

Auglýsingu tillögu að endurskoðun deiliskipulags íþróttasvæðis Þórs á Akureyri lauk þann 19. desember 2024. Ein athugasemd barst við auglýsta tillögu ásamt umsögnum frá Minjastofnun Íslands og Norðurorku. Umsögn umhverfis- og mannvirkjasviðs um efni athugasemdar er lögð fram.

Skipulagsráð frestar afgreiðslu og felur skipulagsfulltrúa að vinna að umsögn um efni fyrirliggjandi athugasemdar í samráði við umhverfis- og mannvirkjasvið.

Fylgiskjöl

• Umsogn_NO_v_Thorssvaedi.pdf
• Íþróttasvæði Þórs-UFA_01 - TILLAGA - Deiliskipulagsbreyting-241028.pdf
• umsögn MÍ 19.11.pdf

Erindi dagsett 7. janúar 2025 þar sem Brynjólfur Árnason fh. Orlofsíbúða ehf. leggur fram tillögu að viðbyggingu við Eiðsvallagötu 18. Viðbyggingin hefur þegar verið reist án leyfis.

Skipulagsráð samþykkir að gerð verði breyting á deiliskipulagi til samræmis við erindið. Er breytingin óveruleg skv. 2. mgr. 43. gr. skipulagslaga nr. 123/2010 og skal hún grenndarkynnt skv. 44. gr. laganna. Grenndarkynnt skal fyrir eigendum í Norðurgötu 16, Norðurgötu 14 og Eiðsvallagötu 20 og samtímis óskað eftir samþykki fyrir byggingu á lóðamörkum.

Ákvörðunin er fullnaðarafgreiðsla með vísan til 42. gr. sveitarstjórnarlaga nr. 138/2011 og 37. gr. samþykktar um stjórn og fundarsköp Akureyrarbæjar nr. 1674/2021.



Helgi Sveinbjörn Jóhannsson M-lista situr hjá og óskar bókað eftirfarandi:

Ég tel að þegar sömu einstaklingar framkvæma fyrst og spyrja svo um leyfi, trekk í trekk, að þá verði að segja stopp á ákveðnum tímapunkti. Nú er þeim tímapunkti náð að mínu mati.

Fylgiskjöl

• Eiðsvallagata 18 - Fyrirspurn.pdf
• b) Fyrirspurn til skipulagsfulltrúa og/eða skipulagsráðs

Erindi dagsett 18. desember 2024 þar sem að Grétar Ómarsson fh. Mílu ehf. óskar eftir framkvæmdaleyfi fyrir 4 metra löngum skurði á gatnamótum Goðaness og Baldursness til að geta tengt saman ídráttarör að norðanverðu í Goðanesi.

Skipulagsráð samþykkir erindið og felur skipulagsfulltrúa að gefa út framkvæmdaleyfi þegar fullnægjandi gögn hafa borist. Hafa skal samráð við umhverfis- og mannvirkjasvið um framkvæmdina.

Ákvörðunin er fullnaðarafgreiðsla með vísan til 42. gr. sveitarstjórnarlaga nr. 138/2011 og 37. gr. samþykktar um stjórn og fundarsköp Akureyrarbæjar nr. 1674/2021.

Fylgiskjöl

• 0696700000gXghwAAC.pdf

Lagðar fram að nýju tillögur að endurskoðun útboðsskilmála fyrir lóðirnar Hofsbót 1 og 3.

Skipulagsráð samþykkir að fela skipulagsfulltrúa að útfæra útboðsskilmála á þann veg að leitað verði eftir kauptilboði í byggingarrétt lóðanna auk þess sem gerðar verði breytingar til samræmis við umræður á fundi.

Liður 3 í fundargerð afgreiðslufundar byggingarfulltrúa dagsettri 12. desember 2024:

Erindi dagsett 28. nóvember 2024 þar sem Júlía Þrastardóttir sækir um stöðuleyfi fyrir 20 feta gám innan lóðar nr. 22 við Hríseyjargötu.

Byggingarfulltrúi óskar umsagnar skipulagsráðs um erindið.

Skipulagsráð telur að ekki eigi að veita stöðuleyfi fyrir gámum á íbúðarsvæðum nema til tímabundinna nota í tengslum við framkvæmdir.

Skipulagsráð hafnar því erindinu.

Erindi dagsett 30. desember 2024 þar sem Thomas Rafal Motyl fh. MF ehf. sækir um langtímaleyfi fyrir matarvagn á Ráðhústorgi.

Skipulagsráð samþykkir úthlutun á langtímaleyfi fyrir MF ehf. út árið 2025 fyrir matarvagn á Ráðhústorgi. Ákvörðunin er fullnaðarafgreiðsla með vísan til 42. gr. sveitarstjórnarlaga nr. 138/2011 og 37. gr. samþykktar um stjórn og fundarsköp Akureyrarbæjar nr. 1674/2021.

Erindi dagsett 25. mars 2024 þar sem Ragnar Freyr Guðmundsson fh. Innbæjar ehf. sækir um byggingaráform og byggingarleyfi fyrir stækkun á byggingarreit og byggingu á svölum á húsi nr. 19 við Hafnarstræti. Innkomin gögn eftir Ragnar Frey Guðmundsson.

Málið var tekið fyrir á 432. fundi skipulagsráðs þar sem því var frestað þangað til að umsögn Minjastofnunar lægi fyrir. Fyrir liggur umsögn Minjastofnunar ásamt lagfærðum updráttum.

Skipulagsráð gerir ekki athugasemd við fyrirliggjandi byggingaráform. Að mati ráðsins er um svo óverulegt frávik frá deiliskipulagi að ræða að hagsmunir nágranna skerðast í engu hvað varðar landnotkun, útsýni, skuggavarp eða innsýn og er því ekki þörf á að gera breytingu á deiliskipulagi sbr. ákvæði 3. mgr. 43. gr. skipulagslaga nr. 123/2010.

Fylgiskjöl

• Alit MI dags des 2024.pdf
• Hafnarstræti 19_12_19_019_100 A-104 A_SKR.pdf

Erindi dagsett 19. desember 2024 þar sem að Svava Björk Bragadóttir fh. Eikar fasteignafélags ehf. óskar eftir leyfi fyrir LED skjá við flóttastiga á norðurhlið Glerártorgs sbr. meðfylgjandi teikningu. Stærð skjás er um 22 fm sem útfærður verður með birtuskynjara sem kemur í veg fyrir truflun. Gerð er grein fyrir heildarfermetrum skilta og ljósaskilta við Glerártorg á meðfylgjandi teikningu. Samantektinni er skipt upp eftir tegund skiltaflata og staðsetningu á byggingu. Sjá nánar fylgigögn umsóknar

Meirihluti skipulagsráðs samþykkir umsóknina með sömu kvöðum og ljósaskilti við Þingvallastræti.



Helgi Sveinbjörn Jóhannsson M-lista og Sóley Björk Stefánsdóttir V-lista sitja hjá við afgreiðslu.

Fylgiskjöl

• _99_2.06 útlit.pdf
• Umsókn um skilti

Erindi dagsett 12. nóvember 2024 þar sem að Elsa Nína Sigurðardóttir óskar eftir að fá að staðsetja minnisvarða um þrjá drengi sem létust í flugslysi á Glerárdal 1995. Óskað er eftir að fundinn verður góður staður í samvinnu við Akureyrarbæ.

Skipulagsráð tekur jákvætt í erindið og samþykkir að vísa málinu til þjónustu- og menningarsviðs og umhverfis- og mannvirkjasviðs til útfærslu í samráði við umsækjanda.

Lagt fram erindi dagsett 21. desember 2024 þar sem Sigfús Ólafur Biering Helgason óskar eftir að fá leyfi til að setja upp minnsvarða um sögu síðutogara og síðutogarasjómenn á Íslandi á landi Akureyrarbæjar suðvestan við Hof.



Steinmar Heiðar Rögnvaldsson byggingarfulltrúi yfirgaf fundinn undir þessum dagskrárlið.

Skipulagsráð frestar afgreiðslu.

Fylgiskjöl

• Pétur Haraldsson skipulagssstjóri Akureyrarbæjar.docx
• Teikning_Minnisvarði_Síðutogarar.pdf
• Teikning_Minnisvarði_Síðutogarar_Málsett.pdf

Breytt lög um leigubílaakstur tóku gildi í apríl árið 2023 sem hafa þau áhrif að ekki eru lengur fjöldatakmarkanir á atvinnuleyfum eins og áður var. Nýlega hafa borist fyrirspurnir um hvort að í miðbæ Akureyrar séu til staðar stæði þar sem leigubílar geta beðið eftir viðskiptavinum, sérstaklega um helgar.

Að mati meirihluta skipulagsráðs gæti núverandi biðsvæði SVA við Hofsbót hentað vel sem biðsvæði fyrir leigubíla eftir að strætó hættir að ganga á kvöldin. Væri það þó eingöngu til bráðabirgða þar til lóðinni er úthlutað og framkvæmdir hefjast. Er skipulagsfulltrúa falið að óska eftir umsögn umhverfis- og mannvirkjasviðs um málið.



Helgi Sveinbjörn Jóhannsson M-lista situr hjá við afgreiðslu.

Lögð fram til umræðu tillaga að breytingu á gjaldskrá gatnagerðar- og byggingarréttargjalda.



Sindri Kristjánsson S-lista vék af fundi undir þessum fundarlið.

Sóley Björk Stefánsdóttir V-lista leggur fram tillögu um að orðalag í grein 5.2 sé sambærilegt og í 6. grein þar sem heimilt er að fella niður gjöld vegna uppbyggingar sérhæfðs félagslegs húsnæðis.

Meirihluti skipulagsráðs hafnar þeirri tillögu.



Meirihluti skipulagsráðs samþykkir fyrirliggjandi drög og vísar málinu til afgreiðslu í bæjarráði.

Sóley Björk Stefánsdóttir V-lista situr hjá.

Lögð fram til kynningar fundargerð 997. fundar, dagsett 12. desember 2024, með fullnaðarafgreiðslum erinda. Fundargerðin er í 8 liðum og er að finna á heimasíðu Akureyrarbæjar.

Lögð fram til kynningar fundargerð 998. fundar, dagsett 19. desember 2024, með fullnaðarafgreiðslum erinda. Fundargerðin er í 7 liðum og er að finna á heimasíðu Akureyrarbæjar.

Lögð fram til kynningar fundargerð 999. fundar, dagsett 9. janúar 2025, með fullnaðarafgreiðslum erinda. Fundargerðin er í 7 liðum og er að finna á heimasíðu Akureyrarbæjar.