Fræðsluráð - 16

Helga Vilhjálmsdóttir forstöðumaður skólaþjónustu mætti á fundinn og gerði grein fyrir stöðu mála og svaraði fyrirspurnum um úrræði í skólakerfinu.

Lokaskýrsla umbótaáætlunar Brekkuskóla lögð fram til kynningar auk staðfestingar fræðslusviðs til mennta- og menningarmálaráðuneytis dagsettrar 5. september 2019.

Rætt um gerð menntastefnu Akureyrarbæjar og framkvæmd hennar.

Fræðsluráð felur formanni og sviðsstjóra að leita aðila til að ljúka vinnu við menntastefnu bæjarins og aðgerðaráætlun.

Erindi dagsett 20. ágúst 2019 frá Valgerði Árnadóttur og Benjamín Sigurðssyni, fyrir hönd Samtaka grænkera, þar sem skorað er á umhverfisráðherra, ríkisstjórn og sveitarfélög Íslands að draga úr neyslu dýraafurða.



Bæjarráð Akureyrarbæjar vísaði erindinu til umfjöllunar í fræðsluráði.

Fræðsluráð bendir á að frumskylda Akureyrarbæjar sé að fylgja manneldismarkmiðum Landlæknisembættisins sem styðst við samnorrænar leiðbeiningar. Á undanförnum árum hefur hlutur kjöts farið minnkandi í fæði grunn- og leikskólabarna og er nú í boði 6 sinnum (af 21 skipti) í mánuði. Þegar kjöt er í aðalrétt er þess gætt að aðrir fæðuflokkar standi börnum til boða. Grænmeti, salat og ávextir eru í boði alla daga.

Ekki er á dagskrá að hætta með kjöt í mötuneytum heldur halda áfram á markaðri vegferð. Áhersla er á að hafa fjölbreytt úrval fæðuflokka og kaupa íslenskar afurðir, helst staðbundna framleiðslu. Með því móti heldur Akureyrarbær áfram ábyrgum rekstri skólamötuneyta.

Lögð fram tillaga að fjárhagsáætlun fræðslu- og uppeldismála fyrir árið 2020 ásamt starfsáætlun. Tillagan gerir ráð fyrir því að rekstur fræðslumála, án framhaldsskólanna sé kr. 19.975.000 undir viðmiðum útgefins ramma sem er kr. 7.440.666.000, þegar tekið hefur verið tillit til 70 m.kr. hagræðingarkröfu.

Meirihluti fræðsluráðs samþykkir framlagða tillögu að fjárhagsáætlun 2020.

Þórhallur Harðarson D-lista og Rósa Njálsdóttir M-lista sátu hjá við atkvæðagreiðslu málsins.

Tillögunni er vísað til bæjarráðs.