Bæjarstjórn - 3501

Liður 3 í fundargerð bæjarráðs dagsettri 28. október 2021:

Lögð fram tillaga að breytingum á samþykkt um stjórn og fundarsköp Akureyrarbæjar.

Inga Þöll Þórgnýsdóttir bæjarlögmaður og Halla Margrét Tryggvadóttir sviðsstjóri stjórnsýslusviðs sátu fund bæjarráðs undir þessum lið.

Bæjarráð samþykkir tillögurnar fyrir sitt leyti með þeim breytingum sem ræddar voru á fundinum og vísar málinu til fyrri umræðu í bæjarstjórn.

Halla Björk Reynisdóttir kynnti breytingatillögurnar.

Í umræðum tóku til máls Hilda Jana Gísladóttir og Guðmundur Baldvin Guðmundsson.

Bæjarstjórn samþykkir með 11 samhljóða atkvæðum að vísa breytingatillögunum til seinni umræðu í bæjarstjórn.

Rætt um lausagöngu katta.

Eva Hrund Einarsdóttir hóf umræðuna og reifaði ýmsa þætti sem snerta kattahald, ágreining um lausagöngu katta og mögulegar lausnir.

Í umræðum tóku til máls Sóley Björk Stefánsdóttir, Andri Teitsson, Gunnfríður Elín Hreiðarsdóttir, Hilda Jana Gísladóttir, Gunnar Gíslason, Guðmundur Baldvin Guðmundsson, Hlynur Jóhannsson, Eva Hrund Einarsdóttir, Heimir Haraldsson, Halla Björk Reynisdóttir og Lára Halldóra Eiríksdóttir.

Meirihluti bæjarstjórnar samþykkir að endurskoða samþykkt um kattahald í bænum. Í þeirri endurskoðun felist að lausaganga katta verði ekki heimil en sett svokallað sólarlagsákvæði inn sem er þrjú ár. Lausaganga katta verði þá ekki heimil frá ársbyrjun 2025. Jafnframt verði settur umtalsvert meiri kraftur í að framfylgja samþykktinni, með sérstakri áherslu á ábyrgð eigenda, skráningarskyldu og fræðslu.

Hilda Jana Gísladóttir S-lista, Sóley Björk Stefánsdóttir V-lista, Heimir Haraldsson S-lista og Halla Björk Reynisdóttir L-lista greiða atkvæði gegn afgreiðslunni.

Hilda Jana Gísladóttir S-lista, Sóley Björk Stefánsdóttir V-lista og Heimir Haraldsson S-lista leggja fram eftirfarandi bókun:

Við hörmum þá niðurstöðu bæjarstjórnar að banna alfarið frjálsa útivist hjá kisum. Bæjarfélagið hefur lítið sem ekkert gert til þess að framfylgja þeim samþykktum sem nú þegar eru í gildi, né látið á það reyna að breyta samþykktum í þá veru að sem flestir geti vel við unað. Hægt hefði verið að stíga það skref að heimila ekki frjálsa útivist að næturlagi og yfir varptíma fugla. Mikilvægara hefði verið að leita lausna fremur en að grípa til banns. Fyrst grípa á hins vegar til banns hefði verið eðlilegra að setja sólarlagsákvæði, þannig að þær kisur sem nú þegar eru útikisur fái að vera það út sinn líftíma.

Rætt um verkefni sveitarfélaga. Sveitarfélög sinna ýmsum verkefnum sem þeim eru falin að lögum, þ.e. lögmælt verkefni, en geta einnig, innan vissra marka, tekið að sér önnur verkefni sem ekki er kveðið á um í lögum, þ.e. ólögmælt eða valkvæð verkefni. Lögmæltum verkefnum má síðan skipta í annars vegar lögskyld verkefni og hins vegar lögheimil verkefni.

Málshefjandi var Halla Björk Reynisdóttir. Auk hennar tóku til máls Hilda Jana Gísladóttir, Guðmundur Baldvin Guðmundsson, Sóley Björk Stefánsdóttir og Gunnar Gíslason.

Fundaáætlun bæjarstjórnar gerir ráð fyrir fundum 7. og 21. desember nk. Lögð fram tillaga um að bæjarstjórn fundi 14. desember en hvorki 7. né 21. desember.

Bæjarstjórn samþykkir tillöguna með 11 samhljóða atkvæðum.

Ásthildur Sturludóttir bæjarstjóri fór yfir helstu atriði í störfum sínum frá síðasta fundi bæjarstjórnar.