Fræðsluráð - 4

Hrafnhildur Sigurðardóttir leikskólafulltrúi kynnti hvað leikskólar eru að gera í tilefni af Degi leikskólans 6. febrúar 2018.

Frístundaráð samþykkti á fundi sínum 25. janúar 2018 að myndaður yrði þriggja manna vinnuhópur um þarfagreiningu og uppbyggingu á 50 metra innisundlaug. Óskað er eftir tilnefningu frá fræðsluráði í vinnuhópinn.

Fræðsluráð tilnefnir Dagbjörtu Elínu Pálsdóttur S-lista sem fulltrúa ráðsins í vinnuhópinn.

Bryndís Björnsdóttir fulltrúi skólastjóra mætti á fundinn kl. 13:23. <br />

Erindi frá foreldri þríbura sem óskaði eftir að fá greiðslur frá Akureyrarbæ til þess að vera heima með börnin þar til í ágúst 2019, í stað þess að börnin þrjú hefji leikskólagöngu í ágúst 2018. Áður á dagskrá fræðsluráðs 4. desember 2017.

Dagbjört Elín Pálsdóttir formaður og Hrafnhildur Sigurðardóttir leikskólafulltrúi fóru yfir málið.

Fræðsluráð samþykkir erindið á þeirri forsendu að um þríbura er að ræða, sem fæddir eru fyrir tímann og viðkomandi er einstæður. Heimgreiðslan skal miðast við niðurgreiðslur bæjarins hjá dagforeldrum. Umrædd greiðsla er skattskyld og ber að taka af henni staðgreiðslu. Greiðslan fer fram í 11 mánuði eða frá 1. ágúst 2018 til 30. júní 2019.

Drög að langtímaáætlun fræðslumála fyrir tímabilið 2018-2027 lögð fram til kynningar.

Fræðsluráð samþykkti að halda annan vinnufund kjörinna fulltrúa fræðsluráðs um langtímaáætlunina fimmtudaginn 15. febrúar kl. 14:00. Lögð er áhersla á að fyrir fundinn munu formaður fræðsluráðs og fulltrúar fræðslusviðs eiga fund með fulltrúum umhverfis- og mannvirkjasviðs varðandi framkvæmdir á tímabilinu.

Eiríkur Björn Björgvinsson bæjarstjóri mætti á fundinn og fór yfir ráðningarferlið.

Hann lagði fram tillögu sína og formanns fræðsluráðs um að Karl Frímannsson verði ráðinn í stöðu sviðsstjóra fræðslusviðs.

Fræðsluráð samþykkir að bæjarstjóri gangi til samninga við Karl Frímannsson um starf sviðsstjóra fræðslusviðs.

Erindi dagsett 31. janúar 2018 frá Félagi dagforeldra um útileiksvæði barna og mikilvægi afgirtra leikvalla í þágu barna sem eru hjá dagforeldrum.

Fræðsluráð tekur jákvætt í erindið og vísar því til umhverfis- og mannvirkjasviðs. Jafnhliða bendir fræðsluráð á mikilvægi þess að leiksvæði og leiktæki uppfylli reglugerð um öryggi leikvallatækja og leiksvæða.

Erindi dagsett 23. janúar 2018 frá skólastjóra Grímseyjarskóla þar sem óskað er eftir að opnuð verði á ný leikskóladeild við skólann.

Hrafnhildur Sigurðardóttir leikskólafulltrúi kynnti minnisblað varðandi forsendur og kostnað á árinu 2018 við opnun leikskóladeildarinnar. Áætlaður kostnaður er kr. 1.430 þús. miðað við 4 tíma vistunartíma í 5 daga vikunnar og starfrækslu í 8 mánuði á árinu 2018.

Fræðsluráð tekur jákvætt í erindið og vísar ósk um viðbótarfjárþörf til bæjarráðs.

Árni K. Bjarnason forstöðumaður rekstardeildar fór yfir rekstur ársins 2017.