Bæjarráð - 3847

Tinna Traustadóttir framkvæmdastjóri sölu og þjónustu og Haraldur Hallgrímsson forstöðumaður viðskiptaþróunar hjá Landsvirkjun komu til fundar og kynntu hvernig Landsvirkjun nálgast raforkusölu til stórnotenda.

Dan Jens Brynjarsson sviðsstjóri fjársýslusviðs sat fund bæjarráðs undir þessum lið.

Bæjarráð þakkar Tinnu Traustadóttur framkvæmdastjóra sölu og þjónustu og Haraldi Hallgrímssyni forstöðumanni viðskiptaþróunar hjá Landsvirkjun fyrir kynninguna.

Liður 1 í fundargerð bæjarstjórnar dagsettri 16. apríl 2024:

Liður 1 í fundargerð bæjarráðs dagsettri 4. apríl 2024:

Lagður fram ársreikningur Akureyrarbæjar fyrir árið 2023.

Dan Jens Brynjarsson sviðsstjóri fjársýslusviðs og Davíð Búi Halldórsson frá endurskoðendum bæjarins Enor ehf. sátu fund bæjarráðs undir þessum lið.

Þá sátu bæjarfulltrúarnir Halla Björk Reynisdóttir, Lára Halldóra Eiríksdóttir og Gunnar Már Gunnarsson undir þessum dagskrárlið í gegnum fjarfundarbúnað.

Bæjarráð vísar ársreikningi Akureyrarbæjar fyrir árið 2023 til fyrri umræðu í bæjarstjórn.

Ásthildur Sturludóttir bæjarstjóri kynnti.

Til máls tóku Gunnar Már Gunnarsson, Hilda Jana Gísladóttir, Sunna Hlín Jóhannesdóttir og Heimir Örn Árnason.

Bæjarstjórn samþykkir með 11 samhljóða atkvæðum að vísa ársreikningi bæjarins fyrir árið 2023 til bæjarráðs og síðari umræðu í bæjarstjórn.

Hilda Jana Gísladóttir S-lista óskar bókað:

Það er áhyggjuefni að A-hluti Akureyrarbæjar sé rekinn með 454 m.kr. tapi. Þá veldur það vonbrigðum að rekstrargjöld aukist hlutfallslega á milli ára umfram rekstrartekjur, þrátt fyrir stórauknar tekjur. Það er lykilatriði í rekstri bæjarins að verja grunnstoðir í rekstri bæjarins, en sérstaklega nauðsynlegt er að verja félagsþjónustuna og tryggja rekstur skólakerfisins með sæmandi hætti. Þá eiga bæjarbúar rétt á að vera upplýstir um raunverulega rekstrarniðurstöðu í stað þess að ársreikningur Akureyrarbæjar sé notaður í markaðs- og ímyndarherferð sem sendi villandi skilaboð til samfélagsins.

Sunna Hlín Jóhannesdóttir og Gunnar Már Gunnarsson B-lista óska bókað:

Það er full ástæða til að fylgjast vel með þróun fjármála sveitarfélagsins og sýna varkárni í útgjöldum, enda hlutverk okkar að viðhalda stöðugleika og vinna okkur nær sjálfbærri fjármálastjórnun. Útgjöld í A-hluta hafa hækkað meira milli ára en tekjur og niðurstaðan fyrir fjármagnsliði er rúmum 400 milljónum lakari en áætlanir gerðu ráð fyrir. Miðað við þær framkvæmdir sem fyrirhugað er að ráðast í, og ef ekkert verður gert til að draga úr útgjöldum, þá er viðbúið að halli á rekstri A-hluta muni aukast á næstu árum. Því er raunveruleg hætta á að við fjarlægjumst fremur en nálgumst markmið okkar um að ná sjálfbærni í rekstri. Að endingu hefði þurft að kynna betur breytingar á reikningsskilaaðferðum Norðurorku, bæði gagnvart bæjarfulltrúum og eins í almennri upplýsingagjöf til íbúa þegar ársreikningur sveitarfélagsins var gerður opinber.

Dan Jens Brynjarsson sviðsstjóri fjársýslusviðs sat fund bæjarráðs undir þessum lið.

Bæjarráð vísar ársreikningnum til síðari umræðu í bæjarstjórn.

Fylgiskjöl

• Ársreikningur samstæðu Akureyrarbæjar 2023_bæjarráð_4.4.24.pdf
• Ársreikningur 2023 - greinagerð.pdf

Rætt um gjaldskrár Akureyrarbæjar.

Dan Jens Brynjarsson sviðsstjóri fjársýslusviðs sat fund bæjarráðs undir þessum lið.

Lögð fram til samþykktar drög að vinnuferli og tímaáætlun vegna gerðar fjárhagsáætlunar.

Dan Jens Brynjarsson sviðsstjóri fjársýslusviðs og Kristín Baldvinsdóttir forstöðumaður hagþjónustu og áætlanagerðar sátu fund bæjarráðs undir þessum lið.

Bæjarráð samþykkir framlagða tillögu að vinnuferli og tímalínu vegna gerðar fjárhagsáætlunar.

Lagður fram viðauki 2.

Dan Jens Brynjarsson sviðsstjóri fjársýslusviðs og Kristín Baldvinsdóttir forstöðumaður hagþjónustu og áætlanagerðar sátu fund bæjarráðs undir þessum lið.

Bæjarráð samþykkir viðauka 2 og vísar honum til staðfestingar í bæjarstjórn.

Viðaukinn er vegna a) stofnunar og reksturs greiningar- og þjálfunarheimilis fyrir úrræði í barnaverndarmálum á Norðausturlandi, viðbót samtals 26,19 m.kr., b) vegna framkvæmda við gluggaskipti og flóttastiga á Ráðhúsi, samtals 42,0 m.kr. og c) vegna lokauppgjörs á rekstri Iðnaðarsafnsins á Akureyri en Minjasafnið á Akureyri mun taka við rekstrinum næstu þrjú árin, samtals 2,5 m.kr.

Útgjaldaaukning vegna viðaukans er 70,69 m.kr. og er mætt með lækkun á handbæru fé. Samhliða viðauka er gerð tilfærsla á 23,5 m.kr. en aðrar tekjur lækka í aðalsjóði vegna breytinga í fæðissölu um 23,5 m.kr. og samhliða lækka önnur útgjöld um sömu upphæð í aðalsjóði.

Lagt fram minnisblað dagsett 29. apríl 2024 varðandi launakostnað vegna forsetakosninga. Mistök urðu til þess að við tilfærslu milli áætlanakerfa komu áætluð laun kjörstjórnar og starfsfólks við undirbúning forsetakosninga og vinnu á kjörstað ekki inn á fjárhagsáætlun 2024. Óskað er eftir viðauka að fjárhæð 8,8 milljónir króna vegna málsins. Sveitarfélög fá kostnað vegna kosninganna endurgreiddan úr ríkissjóði.

Dan Jens Brynjarsson sviðsstjóri fjársýslusviðs og Kristín Baldvinsdóttir forstöðumaður hagþjónustu og áætlanagerðar sátu fund bæjarráðs undir þessum lið.

Bæjarráð samþykkir að gerður verði viðauki við fjárhagsáætlun ársins að fjárhæð 8.815.000 kr. vegna málsins og felur sviðsstjóra fjársýslusviðs að vinna viðaukann.

Lagt fram erindi dagsett 3. apríl 2024 þar sem Páley Borgþórsdóttir lögreglustjóri og stjórnarformaður Bjarmahlíðar óskar eftir styrk til reksturs Bjarmahlíðar þolendamiðstöðvar á Akureyri í tilefni af fimm ára starfsafmæli samtakanna.

Bæjarráð samþykkir að styrkja Bjarmahlíð um 1,5 milljón kr. í tilefni af starfsafmælinu.

Fylgiskjöl

• Erindi sveitarstjórn Bjarmahlíð 5 ára.pdf

Erindi dagsett 22. apríl 2024 frá framkvæmdastjóra Málræktarsjóðs þar sem boðað er til aðalfundar sjóðsins mánudaginn 5. júní kl. 15.30 í fundarsal á 1. hæð í Eddu, Arngrímsgötu 5 í Reykjavík. Akureyrarbær á rétt á að skipa einn mann í fulltrúaráð sjóðsins. Tilnefningar, ásamt netfangi þess sem tilnefndur er, þurfa að berast framkvæmdastjóra í tölvupósti eigi síðar en 9. maí nk.

Bæjarráð felur Hólmkeli Hreinssyni amtsbókaverði að fara með umboð Akureyrarbæjar á aðalfundinum.

Tekið fyrir erindi dagsett 11. apríl 2024 frá Svavari Pálssyni sýslumanninum á Norðurlandi eystra vegna forsetakosninga.

Samkvæmt 69. gr. kosningalaga nr. 112/2021 er atkvæðagreiðsla utan kjörfundar heimil í húsnæði á vegum sveitarfélags, enda skuli sýslumaður að ósk sveitarstjórnar skipa kjörstjóra til að annast atkvæðagreiðslu. Hefð er fyrir atkvæðagreiðslu á skrifstofu Akureyrarbæjar í Hrísey og í Grímsey hjá sérstökum kjörstjóra.

Bæjarráð samþykkir að óska eftir því við Sýslumanninn á Norðurlandi eystra að skipa kjörstjóra í Hrísey og Grímsey vegna utankjörfundaratkvæðagreiðslu forsetakosninga 2024. Jafnframt tilnefnir bæjarráð Önnu Maríu Sigvaldadóttur sem kjörstjóra í Grímsey og Ásrúnu Ýri Gestsdóttur sem kjörstjóra í Hrísey.

Lögð fram til kynningar fundargerð 287. fundar stjórnar Hafnasamlags Norðurlands dagsett 23. apríl 2024.

Lögð fram til kynningar fundargerð 947. fundar stjórnar Sambands íslenskra sveitarfélaga dagsett 19. apríl 2024.

Lagt fram til kynningar erindi dagsett 24. apríl 2024 frá atvinnuveganefnd Alþingis þar sem óskað er umsagnar um frumvarp til laga um lagareldi, 930 mál 2024.

Þess er óskað að undirrituð umsögn berist eigi síðar en 8. maí nk. Umsagnaraðilar geta sent umsögn í gegnum umsagnagátt Alþingis.

Þingskjalið er hægt að sækja á vef Alþingis: https://www.althingi.is/altext/154/s/1376.html