Bæjarráð - 3787

Unnið að gerð fjárhagsáætlunar.

Dan Jens Brynjarsson sviðsstjóri fjársýslusviðs sat fund bæjarráðs undir þessum lið.

Lagt fram erindi dagsett 4. nóvember 2022 frá stjórn Skátafélagsins Klakks varðandi húsnæðismál félagsins í kjölfar breytinga á gildistíma leigusamnings.

Bæjarráð felur bæjarstjóra og formanni bæjarráðs að ræða við stjórn Skátafélagsins Klakks og leggur áherslu á að horft verði til þess að skammtíma- og frístundaþjónusta í Þórunnarstræti 99 fái afnot af kjallara húsnæðisins eins og velferðarráð hefur óskað eftir.

Umræða um vinabæjarsamstarf við Múrmansk og aðild Akureyrarbæjar að Northern Forum.

Hulda Sif Hermannsdóttir aðstoðarmaður bæjarstjóra sat fund bæjarráðs undir þessum lið.

Bæjarráð fordæmir innrás rússneskra stjórnvalda í Úkraínu og leggur til við bæjarstjórn að Akureyrarbær slíti vinabæjarsamstarfi við Múrmansk og jafnframt að Akureyrarbær segi sig úr samtökunum Northern Forum, sem er að stórum hluta samtök sveitarfélaga í Rússlandi.

Bæjarráð vísar tillögunum til umræðu í bæjarstjórn.

Lagt fram til kynningar minnisblað landshlutasamtaka sveitarfélaga á landsbyggðinni vegna byggðaþróunar og atvinnuráðgjafar. Minnisblaðið er tilkomið vegna lausra samninga Byggðastofnunar við landshlutasamtökin annars vegar og hins vegar vegna framlagðra fjárlaga 2023.

Bæjarráð tekur undir áhyggjur landshlutasamtaka sveitarfélaganna vegna byggðaþróunar og atvinnuráðgjafar á landsbyggðunum. Eigi atvinnuráðgjöf og verkefni tengd byggðaþróun að standa undir nafni er mikilvægt að hækka framlagið til Byggðastofnunar, en augljóst er að brýn þörf er á að framlögin verði aukin í takt við þróun launavísitölu og aukinnar ásóknar í ráðgjöf hjá landshlutasamtökunum.

Fylgiskjöl

• Atvinnuráðgjöf og byggðaþróun_fjárlög 2023.pdf

Lögð fram drög að nýjum samstarfssamningi sveitarfélaga sem standa að Heilbrigðiseftirliti Norðurlands eystra.

Bæjarráð samþykkir samstarfssamninginn og vísar honum til staðfestingar í bæjarstjórn, en leggur til eina breytingu þess efnis að heilbrigðisnefnd boði árlega til sameiginlegs fundar með þeim sveitarfélögum sem standa að heilbrigðiseftirlitinu.

Lögð fram til kynningar fundargerð 157. fundar hverfisráðs Hríseyjar dagsett 1. nóvember 2022.

Lagt fram til kynningar erindi dagsett 2. nóvember 2022 frá innviðaráðuneytinu þar sem óskað er umsagnar um frumvarp til breytinga á lögum um Innheimtusofnun sveitarfélaga. Þess er óskað að undirrituð umsögn berist eigi síðar en 14. nóvember 2022 í gegnum samráðsgáttina.