Bæjarráð - 3508

Farið yfir tillögur aðgerðarhóps um framtíðarrekstur Akureyrarbæjar er varða kostnaðarstöð 121.

Dagný Magnea Harðardóttir skrifstofustjóri Ráðhúss og Dan Jens Brynjarsson fjármálastjóri sátu fund bæjarráðs undir þessum lið.

Unnið með tillögur aðgerðarhópsins.

Dan Jens Brynjarsson fjármálastjóri sat fund bæjarráðs undir þessum lið.

Bæjarráð vísar tillögum aðgerðarhópsins með þeim breytingum sem gerðar voru á fundinum til nefnda og felur bæjarstjóra að koma vinnu við úrbótaverkefni aðgerðarhópsins til framkvæmda.

Þá samþykkir bæjarráð að tillögur aðgerðarhópsins verði gerðar aðgengilegar íbúum á vef bæjarins.

Ennfremur samþykkir bæjarráð að kostnaður vegna verkefnisins verði birtur þegar hann liggur endanlega fyrir en gert var ráð fyrir 12 milljónum króna í fjárhagsáætlun vegna vinnunnar.

Lögð fram drög að tekjuáætlun og fjárhagsramma vegna vinnu við gerð fjárhagsáætlunar.

Dan Jens Brynjarsson fjármálastjóri sat fund bæjarráðs undir þessum lið.

Bæjarráð felur fjármálastjóra að fullvinna tekjuáætlun og fjárhagsramma í samræmi við umræður á fundinum og legga fram á næsta fundi bæjarráðs.

Umræður um sérstakar húsaleigubætur.

Dan Jens Brynjarsson fjármálastjóri sat fund bæjarráðs undir þessum lið.

Bæjarráð felur fjármálastjóra að skoða breytingar á reglum um sérstakar húsaleigubætur í samræmi við umræður á fundinum.

Rætt um framkvæmdir við flughlað.

Bæjarráð skorar á ríkisstjórn og Alþingi að leggja nú þegar fjármagn til þess að ljúka flutningi á efni sem til fellur úr Vaðlaheiðargöngum í flughlað við Akureyrarflugvöll. Efnið sem kemur úr göngunum er mjög hentugt sem burðarlag undir flughlað, auk þess sem það kostar ríkið ekkert annað en flutning á svæðið. Það er ljóst að ef þetta tækifæri verður ekki nýtt, mun kostnaður við flughlaðið aukast verulega, þar sem sækja verður efni um lengri veg og greiða fyrir. Það má því fullyrða að það sé í raun samfélagslega óábyrgt að bregðast ekki við nú þegar. Þetta er þeim mun alvarlegra þegar horft er til þess að ríkið í gegnum ISAVIA er að setja tugi milljarða í uppbyggingu á millilandaflugvöllinn á Miðnesheiði. Bent hefur verið á það í fjölmiðlum að stærra flughlað við Akureyrarflugvöll er öryggisatriði í ört vaxandi flugumferð til og við Ísland, þar sem Akureyrarflugvöllur er einn af þremur varaflugvöllum fyrir millilandaflug. Þá skiptir stækkun flughlaðsins miklu máli fyrir uppbyggingu á starfsemi sem tengist flugi til og frá Akureyri og er það ótæk staða að þessi starfsemi þurfi að flytja úr landi vegna aðstöðuleysis.

Að mati bæjarráðs verður ekki unað við að ekkert verði gert og vísar allri ábyrgð á hendur ríkisvaldinu ef ekki verður brugðist við nú þegar og fjármunir tryggðir til að flytja efnið úr göngunum í flughlaðið.

Lagt fram erindi dagsett 30. maí 2016 frá Helgu Írisi Ingólfsdóttur verkefnastjóra brothættra byggða Hrísey og Grímsey. Í erindinu er óskað eftir tveggja milljóna króna framlagi Akureyrarbæjar til að kaupa búnað sem mun bæta netsamband í Grímsey.

Bæjarráð samþykkir að veita tvær milljónir króna til kaupa á búnaði til að bæta netsamband við Grímsey og er bæjarstjóra falið að ganga frá málinu.

2. liður í fundargerð atvinnumálanefndar dagsett 25. maí 2016:

Helga Íris Ingólfsdóttir verkefnastjóri verkefnanna Hrísey, perla Eyjafjarðar og Glæðum Grímsey mætti til fundarins frá Hrísey í gegnum Skype. Helga Íris kynnti stöðu verkefnanna. Einnig var lögð fram endanleg stefnumótun fyrir Hrísey byggðaverkefnið Hrísey, perlu Eyjafjarðar til kynningar.

Atvinnumálanefnd þakkar kynninguna og vísar stefnumótun byggðaverkefnisins Hrísey, perla Eyjafjarðar til kynningar í bæjarráði.

Atvinnumálanefnd lýsir yfir ánægju sinni með störf verkefnastjóra, íbúa eyjanna og bjartsýni um verkefnið í heild sinni.

Bæjarráð lýsir ánægju sinni með þessa vinnu.

Lagt fram samkomulag Akureyrarbæjar við rekstrarstjórn leikskólans Hlíðabóls vegna starfsloka leikskólans dagsett 24. maí 2016.

Bæjarráð samþykkir samkomulagið.

3. liður í fundargerð atvinnumálanefndar dagsett 25. maí 2016:

Lagður fram til umfjöllunar og samþykktar samningur við Fabey um rekstur FabLab í Eyjafirði.

Atvinnumálanefnd samþykkir framlagðan samning með þeim breytingum sem gerðar voru á fundinum og vísar honum til kynningar í bæjarráði.

Atvinnumálanefnd fagnar þeim áfanga sem nú er að nást með stofnun FabLab í Verkmenntaskólanum á Akureyri.

Bæjarráð lýsir ánægju sinni með verkefnið.

Erindi dagsett 23. maí 2016 frá Valtý Kára Daníelssyni þar sem hann óskar eftir styrk vegna þátttöku í ólympíuleikunum í eðlisfræði sem fram fer í Sviss dagana 11.- 17. júlí nk.

Bæjarráð samþykkir styrk að upphæð kr. 50.000 sem er í samræmi við venju og verður tekinn af liðnum styrkveitingar bæjarráðs.

Lögð fram fundargerð viðtalstíma bæjarfulltrúa dagsett 26. maí 2016.

Bæjarráð vísar 3. lið a til bæjarstjóra, 3. lið b til hafnarstjóra, 4. og 6. lið til framkvæmdadeildar, 5 lið til íþróttafulltrúa 1., 2., 8. og 9. liður eru í vinnslu í bæjarráði, 7. liður er lagður fram til kynningar í bæjarráði.

Lögð fram til kynningar 100. fundargerð hverfisráðs Hríseyjar - aðalfundar dagsett 25. maí 2016. Fundargerðina má finna á netslóðinni: http://www.akureyri.is/is/stjornkerfid/hverfisnefndir/hrisey/fundargerdir