Bæjarráð - 3870

Unnið að gerð fjárhagsáætlunar.

Dan Jens Brynjarsson sviðsstjóri fjársýslusviðs og Kristín Baldvinsdóttir forstöðumaður hagþjónustu og áætlanagerðar sátu fundinn undir þessum lið.

Bæjarráð vísar fjárhagsáætlun 2025-2028 til síðari umræðu í bæjarstjórn.

Fylgiskjöl

• Fjárhagsáætlun Akureyrarbæjar_síðari umræða 21.11.24.pdf

Lagt fram samkomulag heilbrigðisráðuneytisins og Akureyrarbæjar um breytt fyrirkomulag vegna byggingar hjúkrunarheimilis á Akureyri fyrir allt að 80 rými. Samkomulagið gerir ráð fyrir að nýtt hjúkrunarheimili verði reist á lóð við Þursaholt í stað Vestursíðu 13 eins og kveðið var á um í fyrra samkomulagi. Breytingin er í samræmi við áform bæjarins um uppbyggingu lífsgæðakjarna fyrir eldri borgara.

Dan Jens Brynjarsson sviðsstjóri fjársýslusviðs, Inga Þöll Þórgnýsdóttir bæjarlögmaður og Pétur Ingi Haraldsson skipulagsfulltrúi sátu fundinn undir þessum lið.

Bæjarráð samþykkir samkomulagið með þeim fyrirvara að láta reyna á þann rétt Akureyrarbæjar að innheimta gatnagerðar- og byggingargjöld og lóðarleigu af lóðinni hjá byggingaraðila í samræmi við 2. mgr. 32. gr. laga um heilbrigðisþjónustu nr. 40/2007.



Bæjarráð telur það algjört forgangsmál að nýtt hjúkrunarheimili verði tekið í notkun á Akureyri eins fljótt og auðið er, enda sár þörf fyrir fleiri hjúkrunarrými í sveitarfélaginu.

Ríkið leggur nú til í fyrsta sinn að einkaaðili byggi og eigi hjúkrunarheimili. Því miður er þó gerð krafa um að sveitarfélagið gefi eftir gatnagerðargjöld, þvert á það sem sagt er fyrir um í lögum.

Bæjarráð telur í ljósi stöðunnar ákaflega mikilvægt að það samkomulag sem liggur fyrir verði undirritað, með fyrirvara er lítur að gatnagerðargjöldum. Mikilvægt er að ólíkur skilningur ríkis og sveitarfélags er varða gatnagerðargjöld verði leyst, án þess að sá ágreiningur tefji uppbyggingu hjúkrunarheimilisins, enda væri það með öllu óboðlegt.

Liður 6 í fundagargerð fræðslu- og lýðheilsuráðs dagsettri 13. nóvember 2024:

Drög að reglum varðandi gjöld og tekjutengdan afslátt fyrir hreyfikort voru lögð fram.

Ellert Örn Erlingsson forstöðumaður íþróttamála og Jóna Jónsdóttir formaður ÍBA sátu fundinn undir þessum lið.

Áheyrnarfulltrúi: Bjarki Orrason fulltrúi ungmennaráðs.

Fræðslu- og lýðheilsuráð samþykkir framlagðar reglur um gjöld og afslátt vegna hreyfikorts og vísar málinu áfram til samþykktar í bæjarráði.

Kristín Baldvinsdóttir forstöðumaður hagþjónustu og áætlanagerðar sat fundinn undir þessum lið.

Bæjarráð samþykkir reglur um gjöld og afslátt vegna hreyfikorts og vísar reglunum til umræðu og afgreiðslu í bæjarstjórn.

Liður 1 í fundargerð fræðslu- og lýðheilsuráðs dagsettri 13. nóvember 2024:

Lagðar voru fyrir til samþykktar uppfærðar reglur um leyfi til reksturs sjálfstætt starfandi leikskóla á Akureyri.

Áheyrnarfulltrúar: Inga Bára Ragnarsdóttir fulltrúi leikskólastjóra, Maríanna Kristín Ragnarsdóttir fulltrúi grunnskólastjóra, Sóley Kjerúlf Svansdóttir fulltrúi leikskólakennara, Erla Rán Kjartansdóttir fulltrúi grunnskólakennara, Daníel Sigurður Eðvaldsson fulltrúi foreldra grunnskólabarna, Róar Björn Ottemo fulltrúi foreldra leikskólabarna og Bjarki Orrason fulltrúi ungmennaráðs.

Fræðslu- og lýðheilsuráð samþykkir endurskoðaðar reglur og vísar málinu áfram til samþykktar í bæjarráði.

Bæjarráð samþykkir reglur um leyfi til reksturs sjálfstætt starfandi leikskóla á Akureyri og vísar reglunum til umræðu og afgreiðslu í bæjarstjórn.

Niðurstöður hverfafunda sem haldnir voru í Naustaskóla og Oddeyrarskóla 18. og 19. september kynntar.

Sumarliði Helgason sviðsstjóri þjónustu- og skipulagssviðs sat fund bæjarráðs undir þessum lið.

Fylgiskjöl

• Niðurstöður - hverfisfundur Oddeyrarskóla.pdf
• Niðurstöður - hverfisfundur Naustaskóla.pdf

Rætt um starfsáætlun þjónustu- og skipulagssviðs.

Sumarliði Helgason sviðsstjóri þjónustu- og skipulagssviðs sat fund bæjarráðs undir þessum lið.

Lagðar fram til kynningar fundargerðir 290., 291., og 292. funda stjórnar Hafnasamlags Norðurlands.

Fylgiskjöl

• 290 fundur 18.09.2024.pdf
• 291 fundur 23.10.2024.pdf
• 292 fundur 13.11.2024.pdf