Bæjarráð - 3624

Lagt fram til kynningar yfirlit um rekstur aðalsjóðs janúar til nóvember 2018.

Dan Jens Brynjarsson sviðsstjóri fjársýslusviðs sat fund bæjarráðs undir þessum lið.

Lögð fram tillaga sviðsstjóra stjórnsýslusviðs um breytingu á heiti sveitarfélagsins. Málið var áður á dagskrá bæjarráðs 1. nóvember sl.

Halla Margrét Tryggvadóttir sviðsstjóri stjórnsýslusviðs sat fund bæjarráðs undir þessum lið.

Bæjarráð leggur til að heiti sveitarfélagsins verði breytt úr Akureyrarkaupstaður í Akureyrarbær og vísar málinu til umræðu og afgreiðslu bæjarstjórnar. Jafnframt felur bæjarráð sviðsstjóra stjórnsýslusviðs að óska umsagnar örnefnanefndar um breytingatillöguna.

Tillaga að nýjum verkfallslista lögð fram til kynningar.

Halla Margrét Tryggvadóttir sviðsstjóri stjórnsýslusviðs sat fund bæjarráðs undir þessum lið.

Bæjarráð samþykkir listann.

Fylgiskjöl

• Verkfallslisti 2019 tillaga samþykkt í bæjarráði 24 janúar 2019.pdf

Liður 8 í fundargerð bæjarstjórnar dagsettri 4. desember 2018:

Umræða um stöðu Akureyrarbæjar sem sjávarútvegssveitarfélags og umsókn um aðild Akureyrarbæjar að Samtökum sjávarútvegssveitarfélaga.

Málshefjandi, Gunnar Gíslason D-lista, tók til máls og reifaði mikilvægi og vægi sjávarútvegs í Akureyrarbæ. Gunnar lagði fram eftirfarandi tillögu:

Akureyrarbær hefur verulega hagsmuni af starfsemi fyrirtækja sem starfa í sjávarútvegi og má ætla að hlutfall heildarlauna af starfsemi sem tengist beint eða óbeint sjávarútvegi á Akureyri sé um 25-30% að minnsta kosti. Þetta hlutfall er enn hærra ef litið er til Hríseyjar og Grímseyjar. Það hlýtur því að þjóna hagsmunum Akureyrarbæjar að vera aðili að Samtökum sjávarútvegssveitarfélaga og er því lagt til að sótt verði um aðild að samtökunum nú þegar.

Í umræðum tóku til máls Andri Teitsson, Hilda Jana Gísladóttir, Gunnar Gíslason, Sóley Björk Stefánsdóttir, Guðmundur Baldvin Guðmundsson, Halla Björk Reynisdóttir, Gunnar Gíslason, Halla Björk Reynisdóttir (í annað sinn), Hilda Jana Gísladóttir (í annað sinn), Sóley Björk Stefánsdóttir (í annað sinn), Gunnar Gíslason og Andri Teitsson (í annað sinn).

Andri Teitsson lagði til að tillögu Gunnars Gíslasonar yrði vísað til umfjöllunar í bæjarráði. Tillaga Andra var borin upp til atkvæða og samþykkt með 8 atkvæðum.

Eva Hrund Einarsdóttir D-lista, Gunnar Gíslason D-lista og Þórhallur Jónsson D-lista greiddu atkvæði gegn tillögunni.

Bæjarráð felur bæjarstjóra að sækja um aðild að Samtökum sjávarútvegssveitarfélaga.

Umræður um veggjöld.

Bæjarráð lýsir yfir stuðningi við að kannaðar verði og útfærðar leiðir til að nýta veggjöld sem lið í að hraða uppbyggingu vegakerfis í landinu, stytta vegalengdir, auka umferðaröryggi og fækka slysum. Bæjarráð hvetur umhverfis- og samgöngunefnd Alþingis til að útfæra þær hugmyndir sem koma fram í minnisblaði meirihluta nefndarinnar dagsettu 19. desember 2018 og taka þá sérstaklega tillit til jafnræðis á öllum sviðum, ekki síst milli byggða landsins. Bæjarráð Akureyrar telur að stytting leiða milli Norður- og Austurlands annars vegar og Norðurlands og suðvesturhornsins hins vegar séu tilvalin verkefni til að nýta veggjöld til fjármögnunar á löngu tímabærum úrbótum. Bæjarráð fagnar því enn fremur að gera eigi langtímaáætlun um jarðgöng á Íslandi og telur veggjöld við nýframkvæmdir þeirra tilvalda leið til útfærslu.

Fylgiskjöl

• minnisblad meirihluta umhverfis- og samgongunefndar.pdf

Liður 7 í fundargerð frístundaráðs dagsettri 21. nóvember 2018:

Eitt af verkefnum Jafnréttisstefnu Akureyrarbæjar er að skipaðir verði þróunarleiðtogar á hverju sviði bæjarins og eins innan ráða og stjórna. Lögð fram tillaga um skipun þróunarleiðtoga, tilgangur, hlutverk og helstu verkefni. Frístundaráð samþykkir að skipaðir verði þróunarfulltrúar í samræmi við það sem kemur fram í Jafnréttisstefnu Akureyrarbæjar og á framlögðu minnisblaði og felur sviðsstjóra að óska eftir tilnefningum slíkra leiðtoga frá hverju sviði og eins frá fastanefndum sveitarfélagsins.

Málið var áður á dagskrá bæjarráðs 29. nóvember 2018 og var afgreiðslu þá frestað.

Bæjarráð tilnefnir Hildu Jönu Gísladóttur sem þróunarleiðtoga ráðsins.

Erindi dagsett 17. janúar 2019 þar sem Mikhail Pogodaev f.h. Northern Forum óskar eftir samstarfi við Akureyrarbæ um viðburðina Youth Environmental Forum 2019 og The Northern Cultures Festival sem Northern Forum hyggst standa fyrir á Akureyri í október 2019.

Bæjarráð felur bæjarstjóra að kalla eftir frekari upplýsingum vegna málsins og leggja fyrir bæjarráð.

Erindi dagsett 9. janúar 2019 þar sem Jón Þórir Þorvaldsson f.h. Skipulagsstofnunar óskar eftir umsögn Akureyrarkaupstaðar um tillögu að matsáætlun um stækkun Keflavíkurflugvallar. Umsögn óskast send fyrir 25. janúar 2019.

Bæjarráð bendir á að eðlilegt sé að meta umhverfisleg og samfélagsleg áhrif stækkunar Keflavíkurflugvallar á dreifingu ferðamanna um landið. Jafnframt bendir bæjarráð á að stækkun Keflavíkurflugvallar og aukin flugumferð um völlinn kallar á tafarlausa uppbyggingu varaflugvalla bæði á Akureyri og Egilsstöðum.

Fylgiskjöl

• Stækkun Keflavíkurflugvallar - Hámörkun afkastagetu flugbrautarkerfis - tillaga að matsáætlun
• Stækkun Keflavíkurflugvallar - beiðni um umsögn

Lögð fram fundargerð viðtalstíma bæjarfulltrúa dagsett 17. janúar 2019.

Bæjarráð vísar lið 1 til skipulagsráðs, liðum 2, 3 og 4 til umhverfis- og mannvirkjasviðs, lið 5 til frístundaráðs og lið 6 til fræðslusviðs.

Lagðar fram til kynningar fundargerðir 315. fundar stjórnar Eyþings dagsett 11. desember 2018 og 316. fundar dagsett 8. janúar 2019.

Fundargerðirnar má finna á netslóðinni: http://www.eything.is/is/fundargerdir-1

Erindi ódagsett, móttekið 22. janúar 2019, frá Páli Björgvin Guðmundssyni f.h. Eyþings þar sem óskað er eftir tilnefningu fulltrúa frá Akureyrarbæ í starfshóp á vegum Eyþings og SSNV sem vinnur að framtíðarskipulagi úrgangsmála á Norðurlandi. Meðfylgjandi er verkefnalýsing.

Bæjarráð tilnefnir Höllu Björk Reynisdóttur í starfshópinn.

Fylgiskjöl

• verkefnlysing urgangsmal.pdf
• osk um tilnefningu Akureyrarbær.pdf

Hulda Sif Hermannsdóttir aðstoðarmaður bæjarstjóra mætti á fund bæjarráðs og fór yfir stöðu úttektar sinnar á innleiðingu stjórnsýslubreytinga.

Bæjarráð óskar eftir því að endanleg úttekt verði lögð fyrir bæjarráð svo fljótt sem auðið er og felur jafnframt bæjarstjóra að vinna tillögur um aðgerðir í kjölfar úttektarinnar.