Ungmennaráð - 43

Farið var yfir atburði frá síðasta fundi. Hugmyndin um að ungmennaráðið myndi skrifa skýrslu um síðasta starfsár var kynnt fyrir ráðinu og ákveðið að skýrslan yrði kláruð fyrir næsta fund. Felix sagði frá UMFÍ ráðstefnunni sem hann tók þátt í.

Rut Jónsdóttir og Ísak Már Jóhannesson frá umhverfis- og mannvirkjasviði kynntu stefnu Akureyrarbæjar í loftslagsmálum. Hugmyndin kviknaði í tengslum við málþing um umhverfis- og loftslagsmál sem haldið verður í Hofi 4. nóvember næstkomandi, þar sem nokkrir fulltrúar ungmennráðs munu taka þátt í pallborðsumræðum. Mjög góðar umræður sem mynduðust á kynningunni.

Fræðslu- og lýðheilsuráð fól Karen Nóadóttur verkefnastjóra barnvæns sveitarfélags og Bjarka Ármanni Oddssyni forstöðumanni skrifstofu fræðslu- og lýðheilsusviðs að aðlaga gátlista varðandi barnvænt hagsmunamat vegna barnvæns sveitarfélags sem tekinn yrði fyrir í lok hvers fundar fræðslu- og lýðheilsuráðs. Um er að ræða tilraunaverkefni til loka árs 2023. Karen kynnti gátlistann fyrir ungmennaráði og fór yfir fyrirkomulagið.

Karen kynnti drög að samningi við Bergið headspace um lágþröskuldaþjónustu við ungmenni. Til stendur að þjónustan opni eftir áramót.

Ungmennaráð tók til umsagnar drög að reglum velferðarsviðs um börn og fjölskyldur þeirra. Þó nokkrar spurningar komu fram sem leitast var svara við til þjónustustjóra velferðarsviðs. Ungmennaráðið taldi svörin fullnægjandi en vildi hvetja Akureyrarbæ til markvissari fræðslu til allra fjölskyldumeðlima, sérstaklega horft til systkina, sem ekki endilega þurfa á sama úrræði að halda og barnið sem er í vanda. Var það bókað sérstaklega.

Ungmennaráð tók til umsagnar drög að reglum velferðarsviðs um stuðningsfjölskyldur. Þó nokkrar spurningar komu fram sem leitast var svara við hjá þjónustustjóra velferðarsviðs. Ungmennaráðið taldi svörin fullnægjandi og engar athugasemdir voru við breytingarnar eða skjalið í heild.

Ungmennaráð bókar að það vilji hvetja Akureyrarbæ til markvissari fræðslu til allra fjölskyldumeðlima, sérstaklega horft til systkina, sem ekki endilega þurfa á sama úrræði að halda og barnið sem er í vanda.

Ungmennaráð tók til umsagnar drög að reglum velferðarsviðs um skammtímadvöl og frístundaþjónustu. Þó nokkrar spurningar komu fram sem leitast var svara við hjá þjónustustjóra velferðarsviðs. Ungmennaráðið taldi svörin fullnægjandi og engar athugasemdir voru við breytingarnar eða skjalið í heild.