Bæjarráð - 3584

Fulltrúar Isavia þau Jón Karl Ólafsson framkvæmdastjóri innanlandsflugvallasviðs og Hjördís Þórhallsdóttir umdæmisstjóri á Norðurlandi mættu á fund bæjarráðs til að ræða málefni Akureyrarflugvallar.

Bæjarfulltrúarnir Ingibjörg Ólöf Isaksen B-lista, Baldvin Valdemarsson D-lista og Eva Hrund Einarsdóttir D-lista sátu fund bæjarráðs undir þessum lið.

Bæjarráð Akureyrar fagnar uppsetningu ILS búnaðar sem koma á upp við Akureyrarflugvöll í sumar og lýsir yfir vilja Akureyrarbæjar til samstarfs við framkvæmd uppsetningarinnar.

Þá skorar bæjarráð á ISAVIA og stjórnvöld að ráðast þegar í mótun framtíðarsýnar flugvallarins. Mikilvægt er í því sambandi að rekstrarfyrirkomulag og eignarhald flugvallarins verði endurskoðað þannig að hægt sé að móta framtíðarsýn og uppbyggingu vallarins og lýsir bæjarráð yfir vilja Akureyrarbæjar til að koma að þeirri vinnu.

Lögð fram til kynningar mánaðarskýrsla um stöðugildi, yfirvinnu og fleira fyrir október, nóvember og desember 2017.

Halla Margrét Tryggvadóttir sviðsstjóri stjórnsýslusviðs sat fund bæjarráðs undir þessum lið.

9. liður í fundargerð velferðarráðs dagsett 17. janúar 2018:

Lagt fram minnisblað dagsett 15. janúar 2018 vegna endurskoðunar á húsnæðisáætlun Akureyrarbæjar þar sem lagt er til að keypt verði sérfræðivinna við endurskoðunina.

Velferðarráð samþykkir tillöguna og vísar málinu áfram til bæjarráðs.

Bæjarráð samþykkir að keypt verði sérfræðivinna við endurskoðun á húsnæðisáætlun Akureyrarbæjar fyrir allt að kr. 2,5 milljónir.

11. liður í fundargerð velferðarráðs dagsett 17. janúar 2018:

Lögð fram ósk sviðsstjóra búsetusviðs um 11 m.kr. aukafjárveitingu vegna tímabundins verkefnis í heimaþjónustu. Verkefnið verður unnið í nánu samstarfi við heimahjúkrun Heilbrigðisstofnunar Norðurlands. Samstarfssamningur er í vinnslu.

Velferðarráð samþykkir ósk um aukafjárveitingu fyrir sitt leyti og vísar málinu áfram til bæjarráðs.

Bæjarráð samþykkir framlagða ósk um 11 m.kr. aukafjárveitingu vegna tímabundins verkefnis í heimaþjónustu og felur sviðsstjóra fjársýslusviðs að útbúa viðauka vegna þess.

Lögð fram fundargerð viðtalstíma bæjarfulltrúa dagsett 18. janúar 2018.

Bæjarráð vísar 1. lið til skipulagsráðs, 2., 4., 6., 7. og 8. lið til umhverfis- og mannvirkjasviðs, 3. og 5. liður eru lagðir fram til kynningar í bæjarráði.