Bæjarráð - 3812

Lagt fram til kynningar fjögurra mánaða rekstraryfirlit Akureyrarbæjar.

Dan Jens Brynjarsson sviðsstjóri fjársýslusviðs og Kristín Baldvinsdóttir forstöðumaður hagþjónustu og áætlanagerðar sátu fund bæjarráðs undir þessum lið.

Lagðar fram forsendur fjárhagsáætlunar Akureyrarbæjar 2024 og drög að tekju- og útgjaldaramma fjárhagsáætlunar 2024.

Dan Jens Brynjarsson sviðsstjóri fjársýslusviðs og Kristín Baldvinsdóttir forstöðumaður hagþjónustu og áætlanagerðar sátu fundinn undir þessum lið.

Bæjarráð felur sviðsstjóra fjársýslusviðs að vinna málið áfram.

Lagðar fram tillögur að breytingu á útfærslu styttingar vinnuviku á leikskólanum Iðavelli, leikskólanum Krógabóli, leikskólanum Klöppum og leikskólanum Lundarseli-Pálmholti.

Halla Margrét Tryggvadóttir sviðsstjóri mannauðssviðs sat fund bæjarráðs undir þessum lið.

Bæjarráð samþykkir framlagðar tillögur að breytingu á útfærslu styttingar vinnuviku á leikskólanum Klöppum, leikskólanum Iðavelli, leikskólanum Krógabóli og leikskólanum Lundarseli-Pálmholti með gildistíma frá 13. ágúst 2023.

Umfjöllun um stöðu yfirstandandi kjaraviðræðna.

Halla Margrét Tryggvadóttir sviðsstjóri mannauðssviðs sat fund bæjarráðs undir þessum lið.

Kynning á nýgerðum kjarasamningum Félagsráðgjafafélags Íslands, Fræðagarðs, Iðjuþjálfafélags Íslands, Sálfræðingafélags Íslands, Stéttarfélags bókasafns- og upplýsingafræðinga, Stéttarfélags lögfræðinga, Þroskaþjálfafélags Íslands, Kjarafélags viðskipa- og hagfræðinga, Félags íslenskra náttúrufræðinga, Verkfræðingafélags Íslands og Sambands íslenskra sveitarfélaga.

Halla Margrét Tryggvadóttir sviðsstjóri mannauðssviðs sat fund bæjarráðs undir þessum lið.

Bæjarráð felur sviðsstjóra mannauðssviðs og sviðsstjóra fjársýslusviðs að útbúa viðauka við fjárhagsáætlun vegna samninganna.

Lögð fram til afgreiðslu tillaga að nýrri mannréttindastefnu Akureyrarbæjar.

Halla Margrét Tryggvadóttir sviðsstjóri mannauðssviðs sat fund bæjarráðs undir þessum lið.



Hilda Jana Gísladóttir S-lista, Sunna Hlín Jóhannesdóttir B-lista og Jana Salóme Ingibjargar Jósepsdóttir V-lista leggja fram eftirfarandi tillögu:

Fjölmenningarráð verði sett á laggirnar hjá Akureyrarbæ, sem veitir bæjarstjórn, nefndum og ráðum Akureyrarbæjar ráðgjöf um málefni og hagsmuni bæjarbúa sem eru innflytjendur.

Greidd voru atkvæði um tillögu Hildu Jönu Gísladóttur, Sunnu Hlínar Jóhannesdóttur og Jönu Salóme Ingibjargar Jósepsdóttur.

Tveir greiddu atkvæði með tillögunni. Tillagan var felld.



Bæjarráð samþykkir að vísa nýrri mannréttindastefnu Akureyrarbæjar til umræðu og afgreiðslu í bæjarstjórn.



Bæjarráð bókar: Akureyrarbær mun hefja formlega innleiðingu heimsmarkmiða Sameinuðu þjóðanna um sjálfbæra þróun á árinu 2024 og málefninu er því vísað til næstu fjárhagsáætlunargerðar. Rétt er að taka fram að þegar er unnið að lýðheilsustefnu og aðgerðaráætlun umhverfis- og loftslagstefnunnar sem hafa heimsmarkmiðin að leiðarljósi. Bæjarráð felur einnig bæjarstjóra að meta það hversu mikið fjármagn og starfskraft þarf til þess að fylgja þessu verkefni eftir.



Hilda Jana Gísladóttir S-lista, Sunna Hlín Jóhannesdóttir B-lista og Jana Salóme Ingibjargar Jósepsdóttir V-lista leggja fram eftirfarandi bókun:

Við teljum mikilvægt að stofnað verði fjölmenningarráð til þess að takast á við þær breyttu áherslur sem fjölmenningarleg samfélög kalla á á flestum sviðum samfélagsins og gefa fjölbreyttari hópi fólks kleift að taka þátt í ákvarðanatöku.

Liður 2 í fundargerð umhverfis- og mannvirkjaráðs dagsettri 6. júní 2023:

Lagt fram minnisblað dagsett 5. júní 2023 varðandi bráðatækninám slökkviliðsmanna.

Gunnar Rúnar Ólafsson slökkviliðsstjóri Slökkviliðs Akureyrar sat fundinn undir þessum lið.

Umhverfis- og mannvirkjaráð samþykkir fyrir sitt leyti beiðni um undanþágu frá reglum Akureyrarbæjar um launað námsleyfi vegna náms tveggja starfsmanna hjá slökkviliðinu í bráðatækni og vísar afgreiðslu til bæjarráðs.

Halla Margrét Tryggvadóttir sviðsstjóri mannauðssviðs sat fund bæjarráðs undir þessum lið.

Bæjarráð samþykkir beiðni Slökkviliðs Akureyrar um heimild til að veita tveimur starfsmönnum SA allt að 13 vikna launað námsleyfi vegna náms í bráðatækni. Greidd eru dagvinnulaun vegna 100% starfs á námstíma.

Liður 4 í fundargerð umhverfis- og mannvirkjaráðs dagsettri 6. júní 2023:

Lagt fram minnisblað dagsett 5. júní 2023 varðandi opnun tilboða í rekstur veitingasölu í Hlíðarfjalli.

Brynjar Helgi Ásgeirsson forstöðumaður Hlíðarfjalls, Hólmfríður Sara Friðjónsdóttir verkstjóri innanhúss skíðastaða og Magnús Arturo Batista svæðisstjóri í Hlíðarfjalli sátu fundinn undir þessum lið.

Umhverfis- og mannvirkjaráð samþykkir fyrir sitt leyti að taka tilboði Bryggjufélagsins ehf. í veitingarekstur í Hlíðarfjalli og vísar því til bæjarráðs til samþykktar.

Guðríður Friðriksdóttir sviðsstjóri umhverfis- og mannvirkjasviðs sat fund bæjarráðs undir þessum lið.



Í upphafi þessa dagskrárliðar vakti Hulda Elma Eysteinsdóttir L-lista á því athygli að hún teldi sig vanhæfa að fjalla um þennan lið.

Með vísan til 7. mgr. 20. gr. sveitarstjórnarlaga nr. 138/2011 var meint vanhæfi lagt upp til atkvæða fyrir bæjarráð og var það samþykkt samhljóða atkvæðum.

Hlynur Jóhannsson tók við stjórn fundarins undir þessum lið.

Bæjarráð samþykkir að taka tilboði Bryggjufélagsins ehf. í veitingarekstur í Hlíðarfjalli.

Liður 12 í fundargerð umhverfis- og mannvirkjaráðs dagsettri 6. júní 2023:

Lögð fram endanleg tillaga að svæðisáætlun um meðhöndlun úrgangs á Norðurlandi 2023-2036.

Sveitarfélög á starfssvæðum SSNV og SSNE hafa unnið sameiginlega að svæðisáætlun um meðhöndlun úrgangs í samræmi við 6. gr. laga um meðhöndlun úrgangs, nr. 55/2003, með síðari breytingum.

Svæðisáætlunin tekur gildi þegar allar hlutaðeigandi sveitarstjórnir hafa samþykkt hana. Að því loknu verða samráðsaðilar upplýstir um samþykkt áætlunarinnar og endanleg áætlun gerð aðgengileg á heimasíðum sveitarfélaga og landshlutasamtakanna tveggja.

Rut Jónsdóttir forstöðumaður umhverfis- og sorpdeildar sat fundinn undir þessum lið.

Umhverfis- og mannvirkjaráð samþykkir fyrir sitt leyti svæðisáætlun um meðhöndlun úrgangs á Norðurlandi 2023-2036 og vísar henni til bæjarráðs.

Guðríður Friðriksdóttir sviðsstjóri umhverfis- og mannvirkjasviðs og Rut Jónsdóttir forstöðumaður umhverfis- og sorpdeildar sátu fund bæjarráðs undir þessum lið.

Bæjarráð samþykkir svæðisáætlun um meðhöndlun úrgangs á Norðurlandi 2023-2026 og vísar henni til umræðu og afgreiðslu í bæjarstjórn.

Liður 13 í fundargerð umhverfis- og mannvirkjaráðs dagsettri 6. júní 2023:

Lagt fram minnisblað dagsett 5. júní 2023 varðandi útboð á meðhöndlun úrgangs, lagðar fram samþykktir um meðhöndlun úrgangs og lagt fram leiðbeiningarit um djúpgáma.

Rut Jónsdóttir forstöðumaður umhverfis- og sorpdeildar sat fundinn undir þessum lið.

Umhverfis- og mannvirkjaráð samþykkir fyrir sitt leyti samþykktir um meðhöndlun úrgangs á Akureyri og vísar til afgreiðslu í bæjarráði.

Guðríður Friðriksdóttir sviðsstjóri umhverfis- og mannvirkjasviðs og Rut Jónsdóttir forstöðumaður umhverfis- og sorpdeildar sátu fund bæjarráðs undir þessum lið.

Bæjarráð samþykkir að vísa framlagðri samþykkt um meðhöndlun úrgangs á Akureyri til umræðu og afgreiðslu bæjarstjórnar.

Erindi dagsett 12. júní 2023 þar sem Albertína Elíasdóttir framkvæmdastjóri SSNE kynnir næstu skref verkefnisins líforkuver við Eyjafjörð. Lögð er fram viljayfirlýsing um áframhaldandi undirbúning að líforkuveri og stofnun þróunarfélags um verkefnið.

Bæjarráð samþykkir viljayfirlýsinguna og felur bæjarstjóra að undirrita hana.